AZE | RUS | ENG |

Agah ol, gör ki, nədir naleyi-ney, nəğmeyi-tar…

Agah ol, gör ki, nədir naleyi-ney, nəğmeyi-tar…
... O gün bəlkə də balaca Nihatın taleyində, sözün həqiqi mənasında, bir dəyişim, bir dönüş nöqtəsi olacaq. Ona görə yox ki, müsabiqənin qalibi olub, ona görə ki, balaca tarzən nəyə qadir olduğunu müsabiqənin münsiflər heyətinə, iştirakçılara və ona ümid bəsləyənlərə inamla sübut etdi. Çətin bir yolun başlanğıcında özünə inamlı olmaq birinci şərtdir.  

Bu günlərdə Azərbaycan Respublikası Təhsil Nazirliyi, Azərbaycan Respublikası Mədəniyyət Nazirliyi və Bülbül adına Orta İxtisas Musiqi Məktəbinin təşkilatçılığı ilə keçirilən ümummilli lider Heydər Əliyevin anadan olmasının 95 illiyinə həsr edilmiş ümumtəhsil və orta ixtisas məktəblərinin şagird və tələbələri arasında gənc ifaçıların III Respublika müsabiqəsi başa çatdı. Qeyd edək ki, bu müsabiqə artıq üçüncü dəfədir keçirilir və həmişə  gənc istedadları qiymətləndirən və onlara daim qayğı göstərən ulu öndər Heydər Əliyevin xatirəsinə ehtiram əlaməti olaraq təşkil olunur.  

Final mərhələsində ifa etdiyi "Şur” muğamı ilə ürəkləri riqqətə gətirən Qobu qəsəbə Uşaq İncəsənət məktəbinin tar sinfinin şagirdi Nihat Quliyev onyaşlılar arasında müsabiqənin qalibi adını qazandı. Nihatın ifasını dinləyəndə böyük Seyid Əzim Şirvaninin misraları yada düşür:

Guş qıl, ey ki bilirsən özüvi vaqifi-kar,
Agah ol, gör ki, nədir naleyi-ney, nəğmeyi-tar.

Nihat Elşən oğlu Quliyev 12 oktyabr 2007-ci ildə Salyan rayonunun Qaraçala kəndində anadan olub. Valideynləri Azərbaycanın dilbər guşələrindən olan Cəbrayıl rayonundan məcburi köçkündür. Bir müddət Salyan rayonunda yaşayıblar, Nihat da orada dünyaya gəlib. Hazırda Qobu qəsəbə Q. Xalıqov adına 1 nömrəli tam orta məktəbin 5-ci sinfində, Qobu Uşaq İncəsənət məktəbinin 4-cü sinfində (tar sinfində) oxuyur. 

Balaca tarzən Nihat Quliyevin sevincini paylaşanlar çoxdur. Ən çox babası Hüseyn, nənəsi Fatma, Qobu qəsəbə 1 nömrəli tam orta məktəbin kollektivi, dostları, qonşuları sevinir. Və sözsüz ki, Nihatın uğuruna çox sevinən bir nəfər də var. Ondan heç bir qayğısını əsirgəməyən, ona tarın hikmətini anladan, Nihatın qalib olması elan olunanda gözləri dolan Qobu Uşaq İncəsənət məktəbində onun tar müəllimi olan İstanbul İsmayıl.

Nihat Quliyev- bu adı yadda saxlayın. Gün gələcək, onun haqqında  Azərbaycanın məşhur tarzəni kimi danışacaqlar. O zaman biz bu sevincimizdə nə qədər haqlı olduğumuzu bir daha hiss edəcəyik. Sorağın daha uca zirvələrdən gəlsin, Nihat!

Vasif SÜLEYMAN
sair, Prezident təqaüdçüsü 
 


Paylaş:

Facebook-da

Reklam

Xəbər lenti

Valyuta məzənnəsi

Tipi Ədə. Adı AZN
IRR 100 İran rialı 0.0040
GEL 1 Gürcü larisi 0.6308
GBP 1 İngilis funt sterlinqi 2.2029
TRY 1 Türk lirəsi 0.2991
KWD 1 Küveyt dinarı 5.6028
SEK 1 İsveç kronu 0.1885
EUR 1 Avro 1.9474
CHF 1 İsveçrə frankı 1.7062
USD 1 ABŞ dolları 1.7000