ADU-da Çin dili günü qeyd edilib - Fotolar
Azərbaycan Dillər Universitetində
(ADU) Çin dili gününə həsr olunmuş bayram tədbiri keçirilib.
Tədbirin açılışında ənənəvi olaraq Çin dilində dərsliklər,
lüğətlər, Ümummilli lider Heydər Əliyev və Prezident İlham Əliyevin Azərbaycan-Çin
əlaqələrinin inkişafı istiqamətində fəaliyyətlərinə həsr olunan kitabların sərgisi
keçirilib.
Tədbirin rəsmi hissəsi Konfutsi İnstitutunun
direktoru, professor Rafiq Abbasovun Çin dilinin tarixi barədə nitqi ilə
başlayıb. O, Çin yazısının banisi, əfsanəvi imperator Xuan Dinin sarayının
tarixçisi, köhnə heroqliflərdən sonra piktoqram növlərini hazırlayan Szyan
Szenin dilin inkişafına verdiyi töhfələrdən söz açıb. Çin dilinin tədrisinin perspektivlərindən danışan R.Abbasov Çin və onun mədəniyyətinin
öyrənilməsinin əhəmiyyətindən də bəhs edib.
Tədbirdə Konfutsi İnstitutunun tələbələri Çin xəttatlıq
sahəsinin ənənəvi üslubu və texnikasını, naxışlarla düzəldilmiş kağızları –
"Szyançji”ni qonaqlara nümayiş etdirib.
Qeyd edək ki, bu tarixi gün Birləşmiş Millətlər Təşkilatının
(BMT) rəsmi dillərinin özünəməxsusluğu və zənginliyini ön plana çəkmək məqsədi
ilə BMT-nın İctimai İnformasiya Departamentinin təklifinə uyğun olaraq 2010-cu
ildə təsis edilib.