Adət, yoxsa həqiqət?
Gözəlliklər gerçəkliyin inikasıdır,
yoxsa subyektiv insan alışqanlığının iddiasıdır? Əlbəttə, çətin sualdır. Əsas
ona görə ki, gerçəkliklə qəbul olunmuşluğun arasında çox incə bir cizgi vardır
ki, hər göz onu görə bilməz. Hətta zaman içərisində bu cizgi fokuslanaraq,
tamamilə görünməz olur. Yəni, görmək istəyənlər də onu görə bilmir – görünənin
həqiqət, yoxsa göz alışqanlığı olduğunu seçib ayıra bilmir.
Qəbul olunmaq nə deməkdir? Hər qəbul
edilən həqiqətdirmi? Məsələ burasındadır ki, bütün gözəlliklər qəbul edilmir.
Ancaq qəbul edilən hər şey gözəl görünür - əlbəttə, qəbul edənlər tərəfindən.
Bəs görəsən, onlar gözəl göründüyü üçün qəbul edilir, yoxsa qəbul edildiyi üçün
gözəl görünür? Bizcə, ikinci versiya daha doğrudur. İnsanlar öncə sevir, sonra
qəbul edir. Deməli, belə çıxır ki, insanlar sevmədiyini qəbul edir? Yox. Qəbul
olunmağın nə sevgiylə, nə də gözəlliklə bir əlaqəsi vardır. Bunun əksini iddia
etmək olar, ancaq fakt faktlığında qalır ki, bu günə qədər çoxluq tərəfindən
qəbul edilən heç bir şey mütləq gözəlliyə və həqiqi sevgiyə layiq olmamışdır.
Ancaq yenə maraqlı sual ortaya çıxır:
bəs onda qəbullanmağın qaynağı nədir? İnsanlar nəyi necə deyil, nə üçün qəbul
edirlər? Gəldiyimiz ümumi qənaətə görə, bu qəbullamağın səbəbi gözəllik deyil,
adətdir. İnsanlar vərdişə yatqındırlar. Vərdiş isə heç bir zaman dərin, çətin,
dolaşıq nəsnələrə şamil edilə bilməz. Yəni, insanlar yüngül və dayaz şeylərə
adət edirlər. Alışqanlıq o qədər sürətli baş verən bir prosesdir ki, yüklü,
mənalı, düşündürücü şeylər o sürətə ayaq uydura bilmirlər. İnsanlar özləri də
bilmədən, özləri də istəmədən həqiqi gözəlliklərdən məhz bu şəkildə imtina
edirlər. İnsan şüuru davamlı yenilənməyi, güncəllənməyi sevmir. İnsanın ən
tənbəl orqanı məhz onun düşüncəsidir. Diqqət etsək görərik ki, eyni toplum eyni
fikri təbliğ edən müxtəlif düşüncə sahiblərini öncə bir-birinin ardınca rədd
edib, sonra qəbul edib. Yeni gələni əvvəl gələnlə üz-üzə qoyub. Bir zaman
daşladığını sonradan daşa çevirib, yeni gələni onunla daşlayıb. Hər gələnə o
qədər daş atıb ki, sonradan o daşlarla həmin dahiyə heykəl düzəldib.
Daşlaşdırmaq insan oğlunun qədim adətidir. İnsan nəsli ruhları daşa
çevirməkdən, yəni tanrını bütə çevirməkdən heç bir zaman əl çəkməyib və
çəkməyəcək. Canlı həqiqəti təmsil edənlər sadəcə, bütxanədəki bütləri
sındırdılar. Ağıllardakı daşlaşdırmaq potensialı isə diri qaldı. İnsanlıq eyni
yolu hər dəfə bitmiş hesab edib. Halbuki, yol heç bir zaman bitməz.
Hər yenilik həqiqət deyil, ancaq hər
həqiqət mütləq şəkildə yenidir. Onun həqiqət olduğunu yeniliyindən anlamaq
olmaz, ancaq yenilik daşları sındıran bir hərəkət olduğu üçün, həqiqət haqqında
müsbət mənada şübhələnməyə dəyər – yetər ki, daşlar sınsın. Bəşəriyyət anlamaq
istəmir ki, bir nəzəriyyəni başqa bir nəzəriyyə gücdən salmır. Eyni Tanrı hər
dəfə öz səhvini başa düşüb yeni din-filan göndərmir. Çünki, insanların bu gün
qəbul etdikləri dünən inkar etdikləridir, başqası deyil. Hər yeni gəliş sınan
daşların içindən çıxan vahid ruhdur. Yeni gələn öncəkini inkar etmir, əksinə
dirildir, həyata qaytarır. İnsanlar o gələni ona görə tanımırlar ki, ondan
əvvəlkini tanınmaz hala salıblar. Nəsimi deyəndə ki, Adəm də mənəm, Nuh da
mənəm, İsa da mənəm, Musa da mənəm, məhz bunu qəsd edirdi. Məna aləmində ruh
birdir. Surət aləminə endyi zaman isə, ruh bədənə, daha doğrusu daşa çevrilir.
Daş olmağın mahiyyətində isə, hərəkətsizlik yatır. Hərəkət etməyən bir Tanrı
sadəcə bütdür – istər daşdan olsun, istər ağacdan, istərsə də sözdən, kitabdan,
hekayədən. Həzrəti İbrahim baş bütü sındırandan sonra baltanı onun yanına
qoydu. Demək istədi ki, bütünüz canlıdırsa, özü desin onu kim vurub. İndi sual
ortaya çıxır; o sındırılan bütün yerinə gələn Tanrının səsi çıxırmı? Əgər
İbrahimin əlində bir balta var idisə və o balta yalnız bir daşı sındırmışdısa,
indi hər kəsin əlində bir balta var və o baltalar həqiqəti gecə-gündüz
sındırır. Niyə səs çıxmır o həqiqət sahibindən? Bəli, mən ateist deyiləm. Ancaq
həmin tanrını da insanlar daşa çevirməsəydi, ondan da səs çıxardı. Tanrı var,
ancaq o, hər gün yenidir. Günəş kimi Tanrı da hər gün yenidən doğur. Bəli, içimizdəki
qaranlıq onu hər gün batırır. Ancaq O, yenə də doğur. Hər doğuluş tanrısaldır.
İnsanlar bunu anlamır. Ölü nəzəriyyələr, daşlaşmış tanrılar, hamısı kütlənin
rahatlığı üçün lazımdır. Sanki, Tanrı libasdır – insan onu əyninə uyğun gəldiyi
zaman geyinir. Həqiqət isə surət deyil, libas deyil, adət deyil.
Əsrlərdir ki, mütləqçilərlə,
nisbiyyətçilər arasında amansız və barışmaz müharibə gedir. Həqiqətin mütləq,
yoxsa nisbi olduğu məsələsi öz həllini tapmır ki, tapmır. Səbəbi isə, çox
sadədir: həqiqəti düzgün yerdə axtarmırlar. O, nə mütləqdir, nə də nisbi. Daha
doğrusu, insanların mütləqlik və nisbilik anlayışları kökündən yanlışdır. Dinin
daşlaşdırma siyasətini elm də davam etdirir. Sadəcə, elmin üstünlüyü ondadır
ki, ağıllı insanlar üçündür. Yəni, Eynşteyn Nyutonu qüvvədən salarsa, dünya
dağılmaz və bunu inkar etmək mümkün deyil. Ancaq İsa gəlib Musanın məbədini
yıxmaq istəsə, bəli, dünya dağılar. Halbuki, İsa o məbədi yıxmırdı, yenidən
inşa edirdi. İsa Musanın daşlardan azad olmuş ruhu idi.
Dindəki daşlardan fərqli olaraq,
elmdə və xüsusilə də incəsənətdəki daşların cəhaləti daha amansız olur. Dindəki
daşların heç olmasa, yalançı bir müqəddəsliyi var. Ancaq daşlaşan incəsənət,
daşlaşan elmi nəzəriyyələr, daşlaşan cərəyançılıq, axınçılıq və sairə, çox
faciəvi nəticələr doğurur. Yuxarıda adını çəkdiyimiz alışqanlıq, vərdiş, adət
özünü ən çox qeyri-dini pərəstişdə göstərir. Bir günlük ömrü olan nəsnələr belə
öz yerini başqasına vermək istəmir. Ən pisi də odur ki, o milçəyi filə çevirib,
ona süni tənəffüslə həyat verən kütlə özüdür. Dayaz sular sürətlə axdığı kimi,
onlar da çox sürətlə yayılır və fantastik çevikliklə vərdiş halına çevrilirlər.
Adətin, alışqanlığın zamanı olmaz, subyekti olar, qurbanı olar.
Bəli, adət öldürür. Ancaq həqiqəti
yox, onu daşıyan insanı. Həqiqət isə, dirildir. Beləliklə, məlum olur ki, ölmək
bu qədər rahat ikən, heç kim dirilmək istəmir. Cavidlərin evini yıxanlar,
cavadları gülləyə düzənlər, abas mirzələrin sümüklərini sındıranların bir çoxu
hələ sağdır və yıxdıqları evə, sındırdıqları sümüklərə bu gün başqaları deyil,
məhz onlar özləri sahib çıxır. Qəribədir, hər şey ölür, bircə adət diri qalır.
Öldürmək olsun, yaşatmaq olsun, fərq etməz, təki insan oğlu bir şeyə vərdiş
etsin. İbadət də vərdiş oldu, sevgi də, elm də sağlıq da, xəstəlik də Tanrı da...
bircə şeytan vərdişə çevrilmədi. O. hər zaman təzədir. Çox maraqlıdır ki, insan
gözəl işlərə adət edir, çirkinliklərə isə hər dəfə yenidən başlayır – sanki
daha öncə belə bir şey yoxmuş kimi. Gözəlliyini xatırlayır, çirkinliyini
unudur.
Dünyanın ən gözəl sözləri
təkrarlandıqca, ölümə bir az daha yaxınlaşır. Söz ölmür, onu daşıyana verdiyi
fayda ölür. Mövlana yaşayır, mövlanaçılar ölür. Elə buna görə də Şəmsin birinci
işi Mövlananın əlindəkiləri alıb, sındırmaq oldu. Çünki, Şəms Cəbrayıl idi,
Mövlana isə mərifətin yeni peyğəmbəri. Şəmsin sındırdıqları Mövlananın daşlaşdırdıqları
idi. Sonra isə kütlə o qırılan daşları ətəyinə toplayıb, onlarla Şəmsi
daşlamağa başladı. Bu günə qədər də həmin daşlama davam edir. Çünki, sonradan
Mövlana daşlaşdı, ancaq Şəms daşlaşmadı. Səbəbi isə, onu daşlaşdıracaq heç bir
pərəstişin, heç bir surətin olmaması idi. Mövlananı isə daşa çevirən onun
gözəlliyi oldu. Fəqət Mövlanaçılar Mövlananı oxumurlar. Oxusalar, o daşı birinci
özləri sındırarlar. Çünki, Mövlana onların əleyhinə danışır. Oxumaq hər bir
şeyin içinə girmək olduğu üçün, daşı da sındırmayınca içində nə olduğunu bilmək
mümkün deyil. Mövlana yenə də Şəmsdən öncəki Mövlanadır. Çünki, kütlə həmin
kütlədir. Şəms bu gün gəlsə, onu keçən dəfəkindən daha betər edərlər. Gizlətmirlər,
özləri də bunu etiraf edirlər. Çünki, Şəms onların adətinə çevrilmədi. Adət
həqiqəti öldürmür, ancaq onu yaxşıca gizlədir. Bu gün "mövlanaçıyam” deyənlərin
böyük əksəriyyəti dindarlardır. Mövlananı bircə dəfə də olsun, açıb oxusalar,
ona "kafər” adı verərlər.
Həqiqət adətin içərisində əriyib yox
olur. Arif və huşyar olanlar isə, kütlədən qaçır ki, daşıdığı elmin işığı
vərdiş otağının lampasına çevrilməsin. "Bütün günahların mənbəyi məhz gözəl
şeylərə vərdiş etməkdir”. Bunu da Şəms Təbrizi deyir. Sirr olmaq, adət
edilməkdən yaxşıdır. Bilinməmək vərdiş halına gətirilməkdən şərəflidir.
Kütlənin ağası olmaqdansa, ariflərin qulu olmaq yaxşıdır. Həqiqətin məkanı
xəlvətdir. Aşkar olan həqiqət ölümə məhkumdur. Həqiqət bir loxma kimidir,
yeyərsən, doyarsan, Adət isə saqqız
kimidir – nə dadı var, nə duzu, nə yemək olur, nə doymaq.
İnsanlar bir dahinin yerini başqa bir
dahiyə vermək istəmir. Başa düşmür ki, məsələ dahidə deyil, dühadadır. Düha isə
şəxs deyil, şəxsdən şəxsə keçən Tanrı həyatıdır. Tanrı diridir. Ancaq necə?
Yalnız və yalnız hərəkət edərək, dəyişərək, candan-cana, bədəndən-bədənə,
ağıldan-ağıla, məkandan-məkana, zamandan-zamana keçərək. Bir zamanlar Həzəti
Pir haqqında "Mövlana Xudavəndikar” deyilirdi. Osmanlı sultanlarına və Anadolu
ərənlərinə "hünkar” deyilməsi də bu sözdəndir. Nə deməkdir bu?
"Xudavəndikar”,yəni "işləyən Tanrı”, "iş Allahı”. İnsanlar başqa bir insana
niyə belə bir ad vermişdilər? Nə oldu o Tanrıya? Hara getdi o insanlar? Heç nə
olmadı, heç yerə getmədi – o insanlar o Tanrını təzədən daşa çevirdilər. Bütlər
şam kimidir; necə ki, əriyən şamdan yeni şam düzəltmək olur, eləcə də qırılan
bütlərdən yenisini düzəldirlər. Material eynidir – daş. Vasitə- adət, səbəb –
rahatlıq. Əsl məna isə, batindədir – onun da adı həqiqəti gizlətməkdir! Hər
necə olur-olsun, həqiqət üzə çıxmamalıdır. Bunun üçün lazım gələrsə, İsanı
çarmıxa çəkənlər o işi yenidən görəcəklər. Yetər ki, ölü tanrılar diri
insanları idarə etsinlər. Çünki Tanrı dirilərsə, insanlıq öləcək! Yaşamaq üçün
həqiqətin canına qıymaq lazımdır!
Lazımsa cəhalətlə güləşmək,
Bir çarə var ancaq yeniləşmək!
Böyük Hüseyn Cavid bunu çox dərin
yerdən demişdi. Ona görə məhz bu məqamda yada düşdü. O, yenilşmək müasirləşmək,
kolxozlaşmaq-filan deyil, daşlardan qurtulmaq idi. Çünki o cəhalət də hər gün
doğulan bir şeytan yavrusudur. Şeytana daş atanlar o daşları şeytanın özündən
alırlar, bundan xəbərləri yoxdur. Halbuki, onu daşlamağın əsl mənası bütləşmiş
həqiqəti daimi şəkildə, hər an, hər gün sındırıb, o daşları özündən kənara
atmaqdır.
Əgər indi məndən bir şüar
istəsəydilər, dilim tutular, heç nə deyə bilməzdim. Çünki, vəsf ediləcək, şüara
dönəcək, qürur duyulacaq heç nə yoxdur. Eləcə də rədd ediləcək, inkar ediləcək,
daşlanacaq bir şey də yoxdur. Zira, hər iki tərəf vərdiş edilib, adət halına gəlib,
alışqanlığa çevrilib. Hər şey belədir. Sevgini də, Tanrını da, həqiqəti də
öldürən onlara adət eləməkdir.
Yoxluq varlığın yeganə xilasıdır. Yenidən
doğuluş yalnız və yalnız ölümlə mümkündür! Hər kəs bir dəfə doğulur, ariflər
hər gün! Çünki, hər kəs bir dəfə ölür, onlar isə hər gün! Ölüm daşların
sınmasıdır və doğuluş yalnız ruhun bu qəfəsdən xilası ilə baş verir. Həqiqət
heç bir zaman tanış gəlməyəcək, hər dəfəsində yeni, adət edilməmiş, hətta inkar
ediləcək qədər tərs və müxalif olacaq. Yalnız bu şərtlər əmələ gəldiyi zaman
Tanrı yenidən zühur edir. Əks təqdirdə, ölüm həyatın, həyat isə ölümün düşməni
olaraq qalacaq!
Fəxrəddin Salim