ADBTİA-dan İnsanın İmmunçatışmazlığı Virusu ilə mübarizəyə dəstək
28 - 29 noyabr 2016-cı il tarixlərində
Respublika QİÇS-lə Mübarizə Mərkəzi "Avropa İİV-ə testləşmə həftəsi” çərçivəsində
Azərbaycan Dövlət Bədən Tərbiyəsi və İdman Akademiyasında (ADBTİA) İnsan
İmmunçatışmazlığı Virusu (İİV) haqqında maarifləndirici seminar keçirib.
Seminarın keçirilməsində əsas məqsəd
İnsanın İmmunçatışmazlığı virusunun (İİV) Azərbaycanda yayılmasının qarşısının
alınması, o cümlədən əhalinin İİV/QİÇS haqqında biliklərinin artırılması,
sağlam və təhlükəsiz həyat tərzinin təbliğidir.
İştirakçıların nəzərinə
çatdırılıb ki, "Avropa İİV-ə testləşmə həftəsi” 20 beynalxalq
təşkilatın təşəbbüsü və Ümumdünya Səhiyyə Təşkilatının himayədarlığı ilə
2013-cü ildə keçirilib. O zaman bu təşəbbüsə Avropanın 400-dən artıq dövlət,
qeyri-hökumət və ictimai təşkilatları, o cümlədən Azərbaycan Səhiyyə
Nazirliyinin QİÇS-lə Mübarizə Mərkəzi də qoşulub.
Məlumat üçün
bildirək ki, maarifləndirici məqsəd daşıyan və sağlam həyat tərzini təbliğ edən
bu tədbir Azərbaycan Dövlət Bədən Tərbiyəsi və İdman Akademiyasının silsilə şəkildə
həyata keçirdiyi sosial yönümlü layihələrdən biridir. Bu cür tədbirlərin həyata
keçirilməsində əsas məqsəd tələbələrin sosial məsuliyyətini artırmaq, onları
sağlam həyat tərzinə ruhlandırmaqdır. Akademiya bundan sonra da gənc nəslin
inkişafına və sağlamlığına yönəlik fəaliyyətini davam etdirmək niyyətindədir.