ABŞ səfirliyi əlilliyi olan insanların pulsuz hüquqi yardım almasına kömək edib
ABŞ-ın Azərbaycandakı Səfirliyi "GÜLSAM” Əlillərin Reabilitasiyası
İctimai Birliyinə "İnsan Haqları üçün Hüquqi Yardım və Təhsil" adlı
layihənin həyata keçirilməsinə dəstək göstərib. Regionlarda qanuni yardım və
əlilliyi olan şəxslərə pulsuz hüquqi yardım göstərmək istəyən vətəndaşlar üçün
layihə Ağsu, Cəlilabad, Salyan və Bakıda altı ay ərzində həyata keçirilib.
Layihənin məqsədi hər bir regionda 20 nəfərədək insanı əmək qanunvericiliyi,
əlilliyi olan şəxslərlə bağlı qanunlar, təhsil hüquqları haqqında hüquqi yardım
və biliklə təmin etmək olub. "2017-ci ilin mayında başlayan layihə, tam təlim
kursu və fərdi məsləhətləşmə sessiyaları vasitəsi ilə öz hüquqlarını öyrənmiş
200 nəfərdən ibarət idi”- deyə "GÜLSAM” Əlillərin Reabilitasiya Mərkəzi İB-nin
rəhbəri Gülnarə Səlimova bildirib: "Yerlərdə hüquqi maariflənməyə böyük ehtiyac
var. Elə insanlar var ki, onlar hətta adi ərizəni yaza bilmirlər”.
Layihənin
eksperti Səməd Vəkilov layihənin regionlarda maraqla qarşılandığını qeyd edib:
"İnsanlar müxtəlif problemlərlə bağlı müraciət edirdilər. Ünvanlı sosial
yardım, əlillik, aliment ala bilməməklə bağlı problemi olan rayon sakinləri
kömək üçün müraciət edirdilər. İnsanların elektron müraciət etməklə bağlı
maariflənməyə ehtiyacları var. Layihə rəhbərliyi onların problemlərini qeyd
edərək aidiyyəti orqanlara çatdırıb. Demək olar ki, problemlərin əksəriyyəti
həll olunub. Hətta ev təmiri ilə bağlı müraciət edən bir şəxsin də evinin
təmiri yerli İH tərəfindən həyata keçirilib”.
İB rəhbəri G.Səlimova layihə təklifi olarsa, yenidən işləməyə hazır
olduqlarını bildirib: "Layihənin davamının olmasına ehtiyac var. Çünki yarımçıq
işlər çoxdur".
Tədbirdə ABŞ Səfirliyinin
nümayəndələri, jurnalistlər, QHT rəhbərləri və əlilliyi olan insanlar iştirak
edib.
Qeyd edək ki, əlilliyi olan şəxslərin reabilitasiyası üzrə
"GULSAM" İctimai Birliyi 1 avqust 2005-ci ildə qeyri-kommersiya
təşkilatı olaraq qeydə alınıb. 2013-cü ildə "GULSAM” əlil insanlar üçün
dərzilik dərslərinin təşkilini həyata keçirib. Təşkilat həmçinin gənclərə
biznes bacarıqları və təcrübələrini öyrədən "Gənclər, QSC” pilot proqramını da
təşkil edib.