ABŞ səfirindən qalmaqallı açıqlama
Amerika Birləşmiş Ştatlarının
Moldovadakı səfiri Ceyms Pettit qalmaqallı açıqlaması ilə tək Moldovada deyil,
qonşu Rumıniyada da aləmi bir-birinə vurub. Səfir ölkənin İctimai Televiziyasında
çıxışı zamanı bəyan edib ki, Moldova müstəqil olmalıdır. O, Moldova ilə
Rumıniyanın birləşməsini mümkünsüz sayıb. Onun sözlərinə görə, rəsmi Kişinyov
birləşmə ilə ölkənin Avropa İttifaqına üzv olacağına ümid edir. Lakin onun
qənaətincə, bu, problemləri həll etməyəcək. "Bizim siyasətimiz ondan ibarətdir
ki, Moldova sərhədləri müdafiə olunan suveren və müstəqil dövlət kimi
qalmalıdır. Avropa İttifaqına düşmək üçün Rumıniya ilə birləşmək və yaxud buna
bənzər başqa bir ideya praktiki məsələ deyil. Bu, Moldovanı yaxşı vəziyyətə
gətirib çıxaracaq hal deyil”. Diplomatik missiyanın rəhbəri daha sonra
Dnestryanı problemi xatırladıb. Onun sözlərinə görə, öz müstəqilliyini elan
etmiş qurum hətta mərkəzi hökumət tərəfindən idarə olunmur. Və bu səbəbdən də
ona xüsusi status verilməsini təklif edib. Səfir C.Pettit "Moldova 1”
telekanalına müsahibəsində onu da bildirib ki, Moldovanın Rumıniya ilə
birləşməsi ideyası gündəmdən çıxarılmalıdır. Səfir sonda bəyan edib ki, Moldova
Rumıniya deyil. O, əlavə edib ki, Moldova üçün əsas məsələ Avropa və Rusiya ilə
bərabər münasibətlər saxlamaqdır.
Birləşmiş Ştatlar
diplomatının bəyanatı Moldova və rumın siyasətçilərinin qızğın reaksiyasına
səbəb olub. Kişinyovda və Buxarestdə unionizm (birləşmə) tərəfdarları amerikalı
diplomatı kifayət qədər məlumatlı olmamaqda ittiham edərək onu ölkələrin daxili
işlərinə qarışmamağa çağırıblar. Onlar
hətta səfirin geri çağırılması ilə bağlı internetdə imzatoplama kampaniyasına
başlayıblar. Leyboristlər Partiyasının rəhbəri Mixail Qimpu ABŞ səfirliyinin
siyasətini Rusiyanın imperiya siyasəti ilə eyniləşdirib. Onun sözlərinə görə,
belə bir çıxışı 2007-2012-ci illərdə Rusiyanın Moldovadakı səfiri olmuş Valeri
Kuzmin də edib. Həmin diplomat Moldovanın işlərinə qarışır, yersiz bəyanatlar
səsləndirirdi. Liberal-Demokratik Partiyadan olan diplomat Mariya Çobanu da C.Pettitin
fikirlərinə sərt reaksiya verib. "Siz bağışlanılması mümkün olmayan bir səhvə
yol vermisiniz. Ölkənin bir millətini, rumınları incitmisiniz. Eləcə də zorla
Rumıniyadan qoparılan bir xalqın qəlbinə toxunmusunuz” - deyə Moldovanın "Ziarul de Garda” qəzeti
deputatın sözlərini sitat kimi verib. Rumın siyasətçiləri isə öz növbəsində səfirin
açıqlamalarını Stalin dövrünün nəzəriyyələri ilə eyniləşdiriblər. Məsələn,
keçmiş baş nazir və hazırda Senatın spikeri Kelin Popesku-Teriçanu bu qənaətə
gəlib ki, səfirin sözləri Stalinin 1939-cu ildə səsləndirdiyi tezisləri
təkrarlayır və ona bənzəyir. Məhz həmin tezislər əsasında da bədnam
Molotov-Ribbentrop sazişi imzalanıb. O əlavə edib ki, öz müqəddəratını müəyyən
etmək hüququnu diplomatlar deyil, vətəndaşlar müəyyən edirlər. Və bu səbəbdən
də ABŞ səfirinin bəyanatları ilə bağlı Milli Liberal Partiya və digər parlament
fraksiyalarının rəhbərlərinin iştirakı ilə məsləhətləşmələr keçirilməsini və
rəsmi bəyannamə qəbul edilməsini təklif edib.
Maraqlısı odur ki, səfirin
fikirlərini dəstəkləyənlər də tapılıb. Sosialist Partiyasının sədri İqor Dodon
Moldova və Rumıniyanın birləşdirilməsi barədə çağırışlara qadağa qoyulmasını
tələb edib. Hətta bu məqsədlə qanun layihəsi hazırlanmasını təklif edib. Onun
qənaətincə, əks təqdirdə bu, moldovan identikliyinin yox olmasına gətirib
çıxara bilər. "Əgər bizi suveren, müstəqil və digər dövlətlərdən asılı
olmadığımızı bəyan etdiyimizə görə tənqid edirlərsə, onda biz çox irəli
getmişik” - deyə "Ziarul de Garda” qəzeti yazır. Xalq Sosialist Partiyasının
lideri Viktor Stepanyuk hesab edir ki, Moldovada vətəndaşların 80 faizi moldovan
dövlətçiliyinin qorunub saxlanılmasının tərəfdarıdır. Bu səbəbdən də çoxları
səfirin sözlərini müdafiə ediblər. V.Stepanyuk xatırladıb ki, ABŞ 1918-ci ildə
də Bessarabiyanın Rumıniyaya
birləşdirilməsinə razı olmayıb.
Xatırladaq ki, bu ilin
martında Moldovada Rumıniya ilə birləşmək barədə plan qəbul olunub.
Unionistlərin qənaətincə, bu plan 2018-ci ildə reallaşa bilər. Lakin elə həmin
tarixdə də Moldova parlamenti suverenliyin toxunulmazlığı, müstəqillik və
neytrallıq haqqında bəyannaməni təsdiq
edib ki, bununla da unionist təşkilatların qadağan olunması üçün əsas yaratmış
olub. İyul ayında "Magenta consulting” sosioloji şirkətinin
keçirdiyi sosioloji sorğuların nəticələrinə görə, Moldova vətəndaşlarının 47
faizi birləşmənin əleyhinə qarşı çıxır. 20 faiz isə ideyanı təhlükəli hesab
edir.
Öz növbəsində NATO baş
katibinin müavini Aleksandr Verşbou da C.Pettitin fikirlərini dəstəkləyib. A.Verşbounun
qənaətincə, Moldova və Rumıniya suveren dövlətlərdir: "Biz Avropada hər bir
suveren dövlətin ərazi bütövlüyünə hörmətlə yanaşmalıyıq. Rumıniya və Moldova
tarixi əlaqələrə malikdirlər və hər biri öz taleyini müstəqil şəraitdə müəyyən
etməlidir”. Almaniya-Rusiya forumunun elmi direktoru Aleksandr Rar bildirib ki,
ABŞ səfirinin bəyanatı Suriya hadisələrinin və Ukraynada baş verənlərin fonunda
Ağ evin siyasətinin dəyişməsi deməkdir: "ABŞ sadəcə postsovet məkanında yeni
bir qaynar nöqtənin yaranmasında maraqlı deyil”.
Qeyd edilir ki, birləşmə
tərəfdarlarının rəhbəri qismində prezident Nikolae Timofti çıxış edir. Bu
səbəbdən də ekspertlər hesab edirlər ki, səfirin bəyanatı vətəndaş cəmiyyətinə
deyil, hakimiyyətə qarşı yönəlib. Ekspertlərin gəldiyi yekun rəy budur ki,
səfirin bəyanatı elə-belə səslənmir. Yaddan çıxarmaq lazım deyil ki, Moldova və
Ukrayna kimi ölkələrdə ABŞ səfirləri bir növ qubernator rolunu oynayırlar.
Onların yanına məsləhət almağa gedirlər və onlar özləri də məsləhət verirlər.
Və indiki halda da səfirin bəyanatı ya ABŞ-ın Suriyada baş verənlərdən sonra
Rusiyaya qarşı mövqeyinin dəyişməsi, ya da Ukraynada baş verən gərgin daxili
siyasi proseslərlə bağlıdır.
Son məlumatlara görə, artıq
ABŞ-ın Moldovadakı səfirliyi önündə
birləşmə tərəfdarlarının piketi də keçirilib. Analoji aksiya Buxarestdə
də baş tutub. Burada da ABŞ səfiri tənqidlərə tuş gəlib. Ölkənin keçmiş
prezidenti Trayan Besesku aksiyada bəyan edib ki, səfirin açıqlaması Buxarestin Vaşinqtonla
münasibətlərinə zərbə vura bilər.Azər NURİYEV