ABŞ məhkəmə sistemi Trampa qarşı
ABŞ Federal Məhkəmə Dairəsinin üç hakimdən ibarət
paneli yekdilliklə aşağı instansiya məhkəməsinin prezident Donald Trampın
ölkəyə daxil olmağa qadağa tətbiq edən sərəncamını dayandırması haqda qərarını
qüvvədə saxlayıb. Məhkəmə qərarının ardınca Ədliyyə Departamenti "qərarı və öz
seçimlərini nəzərdən keçirdiyini” bildirib. Öz hökmündə apellyasiya məhkəməsi
bəyan edib ki, hökumət sərəncamın dərhal qüvvəyə minməsinə olan ehtiyacı izah
etmək üçün dəlil təqdim etməyib.
Hakimlər hər iki tərəfdə ictimai maraqların
olduğunu qeyd edib. "Bir tərəfdən cəmiyyətin milli təhlükəsizliyi və
prezidentin buna uyğun siyasət yürütməsini təmin etməkdə güclü marağı var. Digər
tərəfdən, cəmiyyətin sərbəst səyahət, ailələrin ayrılmaması və
diskriminasiyadan azad olmasında marağı var” - qərarda deyilir. Məhkəmə paneli
hesab etdiyini bildirib ki, hökumət apellyasiya şikayətində sərəncamın qüvvədə
olmamasının böyük ziyan vuracağını sübut edə bilməyib. Məhkəmə qərarına
reaksiya verən Donald Tramp Tvitterdə yazıb: "Sizlə məhkəmədə görüşərik.
Millətimizin təhlükəsizliyi ortadadır”. Trampın tvitinə cavab verən və
sərəncama qarşı çıxan ştatlardan biri olan Vaşinqton ştatının demokrat
qubernatoru Cey İnsli yazıb: "Cənab prezident, biz elə indicə sizi məhkəmədə
gördük və sizi məğlub etdik”.
Ötən həftə Vaşinqton və Minnesota ştatlarının
məhkəməyə müraciət etməsinin ardınca Siettldə Dairə Hakimi Ceyms Robart
müvəqqəti olaraq sərəncamın qüvvəsini dondurdu. Hakim Ceyms Robart prezident
Trampın sərəncamını qüvvədən salan hakim olub. Robartın hökmündən sonra
Tvitterdə qəzəbli reaksiya verən Donald Tramp Robartı "özünü hakim adlandıran”
şəxs kimi təsvir edərək onun qərarının ölkəyə "çoxlu pis və təhlükəli
adamların” axışacağına şərait yaradacağını yazmışdı.
Trampdan söz düşmüşkən, ABŞ-ın yeni prezidentinin
xarici ölkələrin liderləri ilə telefon danışıqlarının mətbuata sızdırılması da dünya
mediasının əsas müzakirə mövzusudur. "The Washington Post” yazır ki, "Ağ ev
narahatdır, prezidentin xarici ölkələrin liderləriylə telefon danışıqlarını
kimin sızdırdığını araşdırır”. Narahatlığa səbəb, özəlliklə,"Röyters”
agentliyinin prezident Donald Trampla Rusiya prezidenti Vladimir Putinin
telefon söhbəti barədə məqaləsi olub. Agentlik söhbətdən xəbəri olan və adının
açıqlanmasını istəməyən rəsmilərə istinad edərək prezidentlərin həm də nüvə
razılaşmasından danışdığını, D.Trampın razılaşmanı pislədiyini yazıb. D.Trampla
V.Putin yanvarın 28-də danışıblar və onların nüvə silahı məsələsinə də
toxunduqlarını indiyə qədər heç kim deməyib. "Biz məsələni araşdırırıq və bu
bizi çox narahat edir”, - deyə Ağ evin sözçüsü Şon Spayser belə deyib. O,
ölkənin mənafeyi naminə ciddi işlə məşğul olduqlarını, amma danışıqların gizli
qalmamasının çox pis hal olduğunu bildirib. D.Trampın Avstraliyanın baş naziri
Malkolm Turnbulla telefon söhbəti haqda isə "The Washington Post” qəzeti
məlumat yayıbmış. D.Trampın nazirə "sizə zəngim indiyə qədərki ən pis telefon
danışığım oldu”, - dediyini yazıbmış. "The Hill” nəşri də Şon Spayserə istinadən yazıb ki, "bu
təfərrüatlardan bəziləri elə xarakter daşıyır ki, bir çox beynəlxalq protokol
və qanunların birbaşa pozulmasıdır”. Onun sözlərinə görə, Tramp baş verənlərlə
əlaqədar çox narahatdır."Bu söhbətlərin mövzusunun açıqlanması ehtimalı
çox narahatlıq doğurur. Axı biz ölkəmizin adından ciddi işlər görməyə
çalışırıq”,- mətbuat katibi qeyd edib.
Mətbuat D.Trampın Meksika prezidentiylə də telefon
söhbətinin gərgin keçdiyini iddia edir. Üstəlik, qəzetlər bütün bu telefon
danışıqları zamanı D.Trampın öz siyasi nailiyyətlərindən, populyarlığından bəhs
etdiyini yazır. D.Tramp "Fox News” telekanalına müsahibəsində bunun "biabırçılıq”
olduğunu söyləyib, utancverici detalları mətbuata çatdırdığına görə sələfi
Barak Obamanın adamlarını, Ağ evdə Obama dövründən fəaliyyət göstərən işçiləri
günahlandırıb.
Kamran