ABŞ-dan sabit Azərbaycana və kriminal Ermənistana tərsinə baxış
Bir neçə gün əvvəl ABŞ Dövlət Departamenti ölkə vətəndaşları
üçün yeni səyahət məsləhətləri hazırlayıb və açıqlayıb. Maraqlıdır ki,
Ermənistan və Gürcüstan birinci kateqoriyada - "Normal Precautions" -
yer alıb. Bu kateqoriya daha aşağı riskli sayılır. Azərbaycan isə 2-ci
kateqoriyada - "Increased Caution"da yer alır. ABŞ Azərbaycana səfər
edən vətəndaşlarını terrorizm riski ilə əlaqədar daha diqqətli olmağa çağırır.
Qeyd edilir ki, terrorçu qruplar Azərbaycana mümkün hücumları planlaşdırmaqda
davam edirlər. Bildirildiyinə görə, terrorçular turistik yerlərə, nəqliyyat
mərkəzlərinə, bazarlara, ticarət mərkəzlərinə, yerli hökumət qurumlarına,
hotellərə, klublara, restoranlara, ibadət yerlərinə, parklara, əsas idman və
mədəni tədbirlərin keçirildiyi məkanlara, aeroportlara və digər ictimai yerlərə
hücumlar edə bilərlər.
Məsələ ilə bağlı Azərbaycanın Xarici İşlər
Nazirliyi açıqlama ilə çıxış edib. Məlumatda bildirilir ki, Azərbaycan
terrorizmin bütün forma və təzahürlərini kəskin şəkildə qınayır və pisləyir:
"Son illərdə Azərbaycana turist axınının 24 faiz artdığı, ölkəmizə gələn əcnəbi
vətəndaşların sayının 2,7 milyon nəfəri ötdüyü, Azərbaycan I Avropa Oyunları,
IV İslam Həmrəyliyi Oyunları, Formula-1 yarışları, mədəniyyətlər və dinlərarası
dialoq forumları, digər yüksək səviyyəli siyasi, iqtisadi, idman və mədəniyyət
xarakterli mötəbər tədbirlərə, o cümlədən ABŞ və Rusiya Baş qərargah
rəislərinin, NATO hərbi komitəsinin rəhbərinin və Rusiya Baş qərargah rəisinin
görüşləri kimi tədbirlərə ev sahibliyi etdiyi halda, ABŞ Dövlət Departamentinin
belə bir açıqlaması çox təəccüblüdür”.
Məlumatda qeyd olunur ki, Azərbaycanın sözügedən
mötəbər tədbirlərə ev sahibliyi etməsi digər amillərlə bərabər, ölkəmizdə
mövcud olan sabitlik, təhlükəsizlik və ictimai asayişin yüksək səviyyədə təmin
olunması ilə bağlıdır: "Azərbaycanın Ermənistan silahlı qüvvələri tərəfindən
işğal olunmuş əraziləri istisna olmaqla, Azərbaycan hökuməti ölkədəki
təhlükəsizlik və operativ vəziyyəti tam nəzarətdə saxlayır. Azərbaycanın
ərazilərinin Ermənistan tərəfindən işğalının davam etməsi regional sülh və
təhlükəsizlik üçün başlıca təhdid olaraq qalır”.
Məlum olduğu kimi, Azərbaycandan fərqli olaraq
Ermənistan regionda qeyri-stabil və təhlükə mənbəyi olmasına baxmayaraq, ABŞ
Dövlət Departamenti onu vətəndaşları üçün təhlükəsiz ölkə olaraq təqdim edir.
ABŞ-ın xarici siyasət idarəsinin bu yanaşması müxtəlif suallar doğurur.
Mövzu ilə bağlı "Kaspi” qəzetinə açıqlamasında Milli Dirçəliş Hərəkatı Partiyasının sədri,
millət vəkili Fərəc Quliyev xatırlatdı ki, ABŞ Dövlət Departamentinin öz
vətəndaşlarına Azərbaycanla bağlı etdiyi xəbərdarlığa Xarici İşlər Nazirliyi
rəsmi münasibət açıqlayıb: "Qeyd edildiyi kimi, Azərbaycan stabil ölkələrdən
biridir. Ölkəmizdə bir çox beynəlxalq konfranslar, tədbirlər, görüşlər
keçirilir. Azərbaycanda sabitliyin pozulması yalnız nəzarətində olmayan və
Ermənistan tərəfindən işğal edilmiş ərazilərdədir. Əgər terror təhlükəsi
olarsa, məhz işğal altındakı nəzarətsiz ərazilərdən Azərbaycana təhdidlər ola
bilər. Orada olan Ermənistan silahlı qüvvələri və ya yaradılan qondarma rejim
tərəfindən təhlükələr də nəzərə alınmalıdır. Onu diqqətə çatdırım ki,
ermənilərin ASALA terror təşkilatı Gürcüstanda, həmçinin Qarabağ ərazisində
yenidən fəallaşmağa başlayıb. Amma Azərbaycan daxilində ciddi şəkildə sabitlik
var. Arzulayardım ki, bu iradları Azərbaycanın Xarici İşlər Nazirliyi ABŞ
səfirliyinə bildirsin. Səfirlik isə öz çağırışında Ermənistanın Azərbaycan
torpaqlarını işğal etməsini və o ərazilərdən ölkəmizə terror təhlükəsinin
olduğunu göstərsin”.
F.Quliyev əlavə etdi ki, ABŞ Dövlət Departamentinin
açıqladığı siyahı ilə əlaqədar olaraq, heç də Amerika-Azərbaycan
münasibətlərinin pisləşməsi haqqında düşünməməliyik: "Hesab etməyək ki, bununla
Azərbaycana təzyiq edirlər. Sadəcə olaraq, Amerika açıqladığı siyahıya
düzəlişlər eləsə, bu, xeyrimizə işləyəcək. Yəni, "Azərbaycanın işğal edilmiş
əraziləri var, bu torpaqlar nəzarətdə deyil və oradan terror təhlükəsi ola
bilər” kimi düzəliş eləsinlər. Bundan başqa, həmin ərazilərdən terror
təhlükəsinin olmasını istəmirlərsə, ərazilərimizin işğaldan azad olunması üçün
BMT-nin dörd qətnaməsini həyata keçirmək istiqamətində Amerika niyyətini və
gücünü ortaya qoysun”.
Siyasi
İnnovasiyalar və Texnologiyalar Mərkəzinin sədri, politoloq Mübariz Əhmədoğlubildirdi ki, ABŞ Dövlət Departamentinin bu siyahısı qeyri-peşəkarlar tərəfindən
hazırlanıb: "Ermənistan və Gürcüstanla müqayisədə Azərbaycan çox təhlükəsiz
ölkədir. Ermənistanda günün istənilən vaxtı şəhərin mərkəzində silah səsləri
eşidilə bilər. Bu ölkə elə bilin ki, kriminal ünsürlərin məskənidir və onlar
orada öz qaydaları ilə hərəkət edir. Hətta mən deyərdim ki, dövlətin tətbiq
etdiyi qaydalar belə, kriminal qaydalara uyğunlaşdırılıb. Söhbət ondan getmir
ki, Ermənistanda İŞİD terrorçusu var, yoxsa yox. Əgər vətəndaşının yaralanması
və ya öldürülməsinin İŞİD-çi, ya da hansısa erməni tərəfindən edilməsinin ABŞ
üçün fərqi varsa, bu artıq başqa məsələdir. Ermənistanda hər həftə böyük
səs-küyə səbəb olan silahlı qətllər qeydə alınır. Elə axırıncı olaylardan biri
o oldu ki, erməni kriminal avtoritetin oğlu avtomobili ilə işıqforun qırmızı
işığında keçərək iki yol polisi əməkdaşını vurub öldürdü. Hətta hadisənin ilk
günlərində onu həbs etmək belə mümkün olmadı.Digər tərəfdən, İŞİD hazırda Ermənistanda kifayət
qədər kök salıb. Ermənistanın özünün açıqladığı rəsmi məlumatlarda qeyd edilir
ki, ilboyu 900 nəfər İŞİD terrorçusu olan şübhəli şəxsin ölkəyə girişinə icazə
verilməyib. Bu terror təşkilatı üzvlərinin 10 faizi ölkəyə giribsə, bu artıq
Ermənistan üçün çox böyük rəqəmdir. Bu mənada, ABŞ Dövlət Departamentində bu
siyahını hazırlayanlar qeyri-peşəkarlardır və reallığı bilmirlər. Ermənistan
Cənubi Qafqaz regionunda ən qeyri-sabit dövlətdir. Biz Ermənistanı haradasa
Latın Amerikasında narkobaronların cəm olduğu dövlətlərlə müqayisə edə bilərik.
Onu da qeyd edim ki, bu məsələdə həm də siyasi maraq var və bu, Azərbaycana
siyasi təzyiqdir. Görünür, yenə haradasa Azərbaycanı ya İrana, ya da Rusiyaya
qarşı hansısa prosesə qoşmaq istəyirlər. Ona görə də bunu bir təzyiq variantı
kimi də qəbul etmək olar. Amma bu siyahı nə qədər pis olsa da, orada yaxşı
məqam da var. Belə ki, ABŞ öz vətəndaşlarına Dağlıq Qarabağa getməyi də məsləhət
bilmir. Demək ki, Amerikada bu siyahını hazırlayanların təhtəl-şüuruna görə
Dağlıq Qarabağ Azərbaycanın daxilindədir”.
M.Əhmədoğlu qeyd etdi ki, ABŞ-ın bu addımını
Azərbaycanın müsəlman ölkəsi olması ilə əlaqələndirmək kökündən yanlışdır:
"Çünki Özbəkistan, Qazaxıstan birinci kateqoriyadadır. Halbuki, 2017-ci ildə üç
Özbəkistan vətəndaşı ABŞ ərazisində terror hadisəsi törədib. Amma Özbəkistan
ABŞ Dövlət Departamentinin siyahısında birinci kateqoriyadadır. Yəni hansısa
islamafob əlamətlər yoxdur. Əgər ABŞ-ın bu yanaşmasında ümumi cəhət
axtarırıqsa, Azərbaycanla Türkiyəyə eyni münasibəti qeyd etmək olar. Ötən il
Türkiyənin ABŞ-la münasibətlərinin pisləşməsi, Rusiya ilə isə, əksinə, daha da
yaxınlaşma bu mənada nəzərdən qaçırılmamalıdır”.
Bəxtiyar MƏMMƏDLİ