50 faiz qənaət imkanı, ekologiya üçün faydalı
Nəqliyyat vasitələrinə sıxılmış təbii qaz
avadanlıqları quraşdıranların sayı artır
Aİ-92
markalı benzinin pərakəndə satış qiymətindəki artımdan sonra taksi sürücüləri
nəqliyyat vasitələrində sıxılmış təbii qaz (STQ) avadanlıqları quraşdırılmasına
daha çox getməyə başlayıblar. Bu işləri icra edən şirkət axtaranları da son
vaxtlar daha çox görürük. Deməli, tələbat artır.
STQ-nin
qiymət cəhətdən sərfəli, ekoloji cəhətdən isə daha az zərərli olduğu
bildirilir. Sərfəlidir, bəs nə qədər qənaət imkanı deməkdir? Bu istiqamətdə
tələbin artmasının nə kimi faydası var? Qeyd edək ki, hazırda bazarda bu işi
çox kəskin fərqli qiymətlərlə icra edənlər haqqında da məlumatlar alırıq. Bu
fərqlər bizə nəyi deyir? Nələri bilməliyik?
E.Muradlı
deyir ki, bu balonların quraşdırılması işində ucuz olana üstünlük vermək sonra
baha başa gəlir: "Azərbaycanda avtomobillərə qaz balonları quraşdırma sahəsində
özünü təsdiq edən bir neçə şirkət var. Ancaq Çin istehsalı olan ucuz mallardan
alıb gətirib, hansısa qarajda bu işi görən və sürücülərə 3 aylıq kredit müddəti
təklif edənlər də var. Qiyməti də sərfəli olur. Deyək ki normal qaz balonu
1500-1800 manata başa gəlirsə, bu adam 900-1000 manata təklif edir. İnsanlar da
ona axın edirlər. İlk vaxtlar təbii ki normal işləyir. 3-5 ay sonra həmin
adamlar yoxa çıxırlar. Bir müddət avtomobildə fəsadlar ortaya çıxanda, sən
onları tapmırsan. Çünki iş keyfiyyətsiz görülürsə, avtomobilin mühərrikində
problemlər ortaya çıxır, salonda qaz qoxusu hiss edilir, digər texniki
problemlər yaranır. Ona görə hər qazquraşdırma məntəqəsinə getməyin tərəfdarı
deyiləm. Çünki ucuz etdirib həmin an 500-600 manat irəli düşə bilərsiniz. Amma
sonra salona qaz qoxusu gəlməməsi üçün avtomobilin hava ötürücü sistemini
dəyişməlisiniz. Bunun ən azı 100-200 manat xərci var. Üstəlik, mühərrikdə
fəsadlar yaradırsa, bu da əlavə xərcdir. Gün gəlir, baxırsınız ki, 1500-1800
manata daha keyfiyyətli balon qoydursaydınız, ondan ucuz başa gələrdi.
Bazarda
Türkiyə, İtaliya, Ukrayna şirkətləri də var. Xarici olub-olmadığına deyil,
zəmanətinə, etibarlılığına önəm vermək lazımdır”.
Ekspert
bildirdi ki, qənaət etmək cəhətdən benzinlə qaz arasında fərq böyükdür:
"Benzinlə işləyən avtomobillə Qubaya gedib gəlmək üçün 30-40 manat yanacaq sərf
edəcəksinizsə, 15 manat qaz vurub gedib-gələ bilərsiniz. 50 faizdən də çox
üstünlüyü var. İndi benzinin qiymətində bahalaşma oldu, ona görə qaz daha da
sərf edəcək. Təəssüf ki qazın da qiymətini süni şəkildə bahalaşdırdılar. Rəsmi
qiymət artımı olmasa da, 40 qəpikdən 45-50 qəpiyə qaldırdılar. Bəzi yerlərdə
süni qıtlıq yaratdılar. Sıxılmış qazı bəzi yerlərdə tapmaq olmur. Bu cür hallar
baş verir. Bəzi yanacaqdoldurma məntəqələri süni problem yaradır ki, insanlar
qaza meyillənməsinlər”.
E.Muradlı
deyir ki, indi bu işlər daha peşəkar üsullarla icra edildiyi üçün 90-cı
illərdəki qədər təhlükəli deyil: "90-cı illərdə məişətdə istifadə etdiyimiz qaz
balonunu maşına qoyub nəqliyyat vasitəsini idarə edənlər var idi. Maşın getdiyi
yerdə yanırdı, partlayırdı. Amma indiki balonlar tamam başqa funksiyadadır. Həm
də yol polisi tələb qoyub ki krossover tipli avtomobillərə qaz balonu
quraşdırmırlar. Yalnız o avtomobillərə quraşdırılır ki, baqajla salonun arası
kəsilmiş olsun, təhlükə, yanğın, partlayış olsa, salona verməsin. O da təzə
avtomobillərdə bu effekti verir, köhnələrdə yox. İndiki qaz balonları kürə
şəklində olur, bir neçə qatdan ibarət qoruyucu metalla bərkidilir. Azərbaycanda
bununla bağlı son illər problemə rast gəlməmişəm. Əvvəlki yanacaq qiymətinin
artması dövründə də qaz balonu quraşdırılmasına kütləvi axın olmuşdu. Neçə il
keçib hardasa partladığını, yandığını eşitməmişəm. Tez sıradan çıxa,
avtomobilin mühərrikinə ziyan vura bilər, amma qaz balonunun maşında
partladığını eşitməmişəm. 90-cı illərdəki qorxu insanlarda qala bilər, amma bu
balonlar tamam başqadır”.
E.Muradlı
qeyd etdi ki, hazırda insanlarımızda daha çox maraq hibrid avtomobillərədir:
"Qaz qənaət imkanı verir, amma çox da uzunömürlü olmayacaq. Gələcəyin
avtomobilləri elektrik avtomobilləridir. Tam elektrik avtomobillərinə
insanlarımız üstünlük vermirlər, çünki tam elektrik mühərrikli avtomobillərin
respublika üzrə maddi texniki bazası, servis xidməti, ehtiyat hissələri və s
yoxdur. Bakıda normal usta tapa bilmirsən. Amma yarı benzin, yarı elektriklə
işləyən hibrid avtomobillərə insanlarımızın marağı var”.
Ekoloq Vaqif Əliyev bildirdi ki, ekoloji cəhətdən yanaşanda, benzinlə
müqayisədə qazın üstünlüyü çox böyükdür: "Yanacaq məhsullarının ekologiyaya
təsirinin müqayisəsi havaya buraxdıqları tullantıların miqdarı ilə ölçülür.
Məsələn, daş kömür, benzin və qazı müqayisə etsək, ekoloji cəhətdən ən yaxşısı,
ən az zərərlisi qazdır. İndi benzinin qiyməti artandan sonra sıxılmış qaza
üstünlük verənlərin sayı da çoxaldı, amma ümumilikdə energetika təşkilatları
belə, qazla işləməyə üstünlük verirlər. Havaya buraxılan tullantının miqdarının
azalması üçün bu, çox önəmlidir. Düzdür, dünyada ümumiyyətlə, alternativ enerji
mənbələrinə daha çox üstünlük verilməsinə gedilir. Amma bunun maya dəyəri bir
az baha çıxır. Ənənəvi yanacaq məhsullarından ən dəyərlisi qazdır. Məsələyə
gələcəyə yönümlü baxsaq, ondan da yaxşısı elektriklə işləyən maşınlardır.
Zamanla buna keçmək daha yaxşı olar. Çünki ekologiyaya zərər vurulmaması üçün
bunlar daha vacibdir”.
Aygün