3 saata viza
Turizm
hər bir ölkə üçün əhəmiyyətli sektordur. Azərbaycanda da turizm sektoru yeni
mərhələyə qədəm qoyub. Son dövrlər ölkəmizdə keçirilən beynəlxalq səviyyəli oyunlar
turist axınında əhəmiyyətli rol oynayır. Ölkəmizə davamlı olaraq Avropa, Asiya
və Afrika ölkələrindən minlərlə turist gəlir. Turist axınının bu qədər
genişlənməsi ölkəmiz üçün iqtisadi baxımdan çox böyük önəm kəsb edir. Turistlərin
bu qədər çox axın etməsi qeyri-neft sektorunun inkişafına birbaşa təsir
göstərir.
Turizm
sahəsinin inkişafı ilə bağlı dövlət səviyyəsində tədbirlər görülür, qərarlar
qəbul edilir. Bu kontekstdə Azərbaycana
gələn turistlərin 3 saat ərzində elektron viza ala bilməsi ilə bağlı "Turizm
haqqında” qanuna dəyişiklik edilir. Trend-in məlumatına görə, bu barədə Milli
Məclisin Əmək və sosial siyasət komitəsinin 14 dekabr tarixində keçirilən
iclasında bildirilib.
Qeyd
edək ki, bu il avqustun 30-dan etibarən əcnəbilər və vətəndaşlığı olmayan
şəxslər "ASAN Viza” sistemi vasitəsilə qeyri-iş və bayram günlərindən asılı
olmayaraq elektron vizaların 3 saat ərzində alınması üçün müraciət edirlər.
Biz
də edilən dəyişikliyin növbəti mərhələdə hansı nəticələri verəcəyini, həm
turizm sahəsinin inkişafına, həm də miqrasiya məsələlərinə necə təsir edəcəyini
öyrənməyə çalışdıq.
"Millenium”
turizm şirkətinin rəhbəri Ruslan Quliyev bu
dəyişikliyin turizm inkişafına birmənalı şəkildə öz müsbət təsirini göstərəcəyini
bildirdi: "Bilindiyi kimi, 2012-ci ildən cənab prezidentin fərmanı ilə viza
alma prosedurası sadələşməyə doğru gedir. Bu da gözlənilən nəticələri verdi.
Belə ki, turizm sahəsinə böyük bir axın yarandı. Tutaq ki, əvvəllər viza bir
neçə iş günü ərzində alınırdısa, indi cəmi üç saat ərzində elektron vizanı əldə
etmək mümkün olacaq. Bu da ölkəyə turist axınına şərait yaradacaq. "Asan viza”nın
tətbiq edilməsi "İpək yolu”nun daha
populyarlaşmasına, istər Avropa, istər Asiya ölkələrinin vətəndaşları üçün
ölkəmizin əlçatan olmasına səbəb olacaq”.
Turizm üzrə ekspert Rüfət Məmmədovda hesab edir ki, ümumiyyətlə, elektron vizanın tətbiq edilməsi ölkə üçün
olduqca əhəmiyyətlidir: "Elektron viza həm vaxta, həm də pula qənaət deməkdir.
Bu da müştəri məmnuniyyətini artıracaq. Çünki viza almaq olduqca vaxt aparan bir
proses idi. Bu da insanların başqa bir ölkəyə getməsini şərtləndirirdi.
Düşünürəm ki, Azərbaycanı turizm sahəsində inkişaf etmiş bir ölkəyə çevirmək
üçün viza sahəsində olan sadələşmə böyük önəm daşıyır. Hər bir dövlət turist axınını
təmin etmək üçün bu kimi məsələlərə xüsusi diqqət ayırmalıdır. Amma bir məsələ
var ki, bu hansı ölkələrdən gələn əcnəbilərə şamil ediləcək. Xüsusi seçilmiş
ölkələr olacaq, ya bütün xarici ölkə vətəndaşları bu fürsətdən istifadə edə
biləcək? Təbii ki, bütün ölkələrə şamil edilsə daha yaxşı olar. Bu, turizmin
inkişafında xeyli dərəcədə əhəmiyyətli addımdır”.
Miqrasiya məsələləri üzrə ekspert Sahib Məmmədov vizanın
səyahət etmək üçün ölkə seçimi zamanı əsas rol oynayan faktorlardan biri
olduğunu dedi: "Bir ölkədən digərinə getmək istəyən şəxsi maraqlandıran əsas
mövzulardan biri də viza məsələsidir. Tutaq ki, pulun da, həvəsin də var. Hansısa
bir ölkəyə səyahət etmək istəyirsən. Amma baxırsan ki, viza almaq məsələsində
işlər çətinləşir. Bir sıra sənədləri hazırlamalı, harasa göndərməli, onların
təsdiq olunması gözləməlisən. Təbii ki, həmin proses müəyyən zaman çərçivəsində
həll olunur. Bu da insanları səyahət etmək üçün həvəsdən salır. Daha asan
şəkildə viza əldə edə biləcəkləri ölkəni seçirlər. İnsanlara vizası daha asan
əldə olunan ölkələr cəlbedici olur. Yəni səyahət etməyə ölkə seçimi zamanı viza
əsas rol oynayan faktorlardan biridir. Bu baxımdan atılan addımı müsbət
qiymətləndirirəm”.
Müsahibimiz
bildirir ki, bəzi ölkələrin vətəndaşları üçün viza sisteminin ləğvi daha uğurlu
addım olar: "Mən istərdim ki, bəzi Avropa ölkələri ilə ümumiyyətlə viza rejimi
ləğv olunsun. Və yaxud da vizanı ölkəyə daxil olduqdan sonra, yəni elə hava
limanında ala bilsinlər. Hazırda dünyanın elə ölkələri var ki, onların vətəndaşları
üçün BMT-yə üzv olan ölkələrdən 170-ə yaxını viza rejimi tətbiq etmir. Misal
üçün, Yeni Zelandiya, Avstraliya və Avropanın bir çox ölkələrinin vətəndaşları
üçün viza qoymağa ehtiyac yoxdur. Düzdü, onlar bizim vətəndaşlarımız üçün viza
sistemi tətbiq edəcəklər. Amma burada maraqlı olan tərəf bizik. Çünki istəyirik
ki, ölkəmizə gələnlərin sayı çox olsun. Dünyada ən güclü pasportu olan top
onluğa daxil olan ölkələr var. Hansı ki, həmin dövlətlərin vətəndaşları
dünyanın bir çox ölkələrinə vizasız gedib gəlirlər. Bəs biz niyə həmin sistemi
tətbiq etməyək? Qonşu ölkələrdən Qazaxıstan bu rejimi tətbiq etdi. Amma
düşünürəm ki, bunu biz etsək, daha çox əcnəbi cəlb edə bilərik. Bu, bizdə daha
uğurlu alınar”.
Günel Azadə