Distant iş zamanın tələbi kimi
"Azərbaycan
distant iş və onlayn menecmentliyin tətbiqində maraqlı olmaqla yanaşı, bu
prosesdə potensialı olan ölkədir”
Distant iş hazırda bütün dünyada əmək bazarının
imkanlarını genişləndirir. Məsafədən idarəetmənin müəssisələr və şirkətlər üçün
müsbət tərəflərindən biri, işçi heyəti üçün ofisin icarəyə götürülməsinə
ehtiyacın olmaması və bir sıra xərclərə qənaət edilməsi ilə bağlıdır. Bu iş
prosesində, hətta, başqa bir şəhərdə yaşayan mütəxəssislə də işləmək mümkündür.
Pandemiya şəraitində əmək formasının bu cür münasibətləri iş yerlərini, əmək
haqlarını, müəssisənin iş qabiliyyətini saxlamaq baxımından optimal görünür.
Əmək qanunvericiliyinə görə, distant iş zamanı müəssisənin işçi heyəti öz
vəzifəsini ofisdə deyil, evində yerinə yetirir. Bu cür əməkdaşlıq, vaxtı yolda
itirməmək baxımından da işçilər üçün əlverişlidir. İlk baxışdan elə görünə
bilər ki, distant iş əməyin təşkilinin yüngülləşdirilmiş variantıdır. Ancaq
Əmək Kodeksinə görə, distant iş işçilərin çalışdıqları müəssisədən kənarda öz
funksiyalarını yerinə yetirməsi deməkdir.
Qeyd edək ki, dünya ölkələrində bu prosesə artıq
çoxdan start verilib. Məsələn, Rusiyada da COVİD-19 pandemiyası səbəbindən
distant iş məsələsi xeyli aktuallaşıb. Koronavirusa görə, Rusiya hökuməti hələ
mart ayında müəssisələrə distant iş formatına keçməyi təklif edib. Bir ay
keçəndən sonra artıq məsafədən işləyən şirkətlərin sayı xeyli artıb. Fevral ayı
ilə müqayisədə isə Rusiyada bu rəqəm 71 faiz çoxalıb. Ruslar özünütəcrid zamanı
distant işin onları qane etdiyini deyirlər. Hərçənd, aralarında iş
effektivliyinin aşağı düşdüyünü söyləyənlər də var. Bəziləri şəxsi həyatı ilə
iş arasında hüdud yaratmağın onlar üçün çətin olduğunu bildirir. Hətta,
bəziləri bu cür rejimdə səhhətlərinin korlandığından, artıq çəki aldıqlarından
gileylənirlər. «İnsan yeni reallığa zamanla adaptasiya olunur» - deyə «Qlobal
Venture Alliance»nın baş direktoru Zamir Şuxov bildirib: "Digər tərəfdən,
insanların illərlə öyrəşdiyi bir mühitdən ayrılmaları çətin olur. Amma bu, zamanın tələbidir”.
Rusiya hökuməti itkiləri minimuma endirmək üçün spesifik
sahələrin bütünlüklə distant işə keçid məsələsini planlaşdırır. Düzdür, çox
müəssisələrdə iş hələ əvvəlki normalarla davam etsə də, kənardan idarəetmə
məsələsi daha çox gündəmdədir. Hətta, ölkədə elə hesab edirlər ki, distant iş
pandemiyadan sonra da normaya çevriləcək. Artıq ölkədə müəssisə və şirkətlərin
personalı distant iş rejimində işləməyə hazırdır. "Bu, bir işçinin karyera
perspektivlərinə zərbədirsə, başqaları üçün yeni üfüqlər açır. Artıq bir neçə
aydır ki, Rusiya şirkətlərinin minlərlə əməkdaşı öz evlərindən işləyirlər.
Karantindən sonra da onların bir çoxu işə gəlməyəcək. Çox şirkətlər distant iş
rejimini saxlamağı planlaşdırdıqlarını elan ediblər. Belə ki, bu, onlara xərclərə
qənaət etməyə, ofisləri ixtisara salmağa və regionlarda daha ucuz işçi qüvvəsi
işlətməyə şərait yaradıb. Bu, böyük şəhərlərin sakinlərinin karyera
perspektivlərini məhdudlaşdırırsa, əyalət mütəxəssisləri üçün yeni imkanlar
yaradır”- deyə qeyd edilir.
Bizim ölkəmizdə də distant iş rejimi tətbiq olunur.
Xüsusən, pandemiya dövründə məsafədən iş, onlayn təhsil və s. məsafədən
idarəetmə məsələləri gündəmə gəldi. "Hazırda biz rəqəmsal transformasiya üzrə
hökumət strategiyası üzərində işləyirik. Həmçinin, distant işlə bağlı
məsələlər... Bu da ölkə üçün olduqca vacibdir. Təxminən bunlar bizim
planlarımızda diqqətimizi cəmlədiyimiz sahələrdir”- deyə Prezident İlham
Əliyevin "Microsoft” şirkətinin təşəbbüsü ilə şirkətin vitse-prezidenti və
digər nümayəndələri arasında keçirilən videokonfrans zamanı qeyd etdiyi
fikirlər də məsələnin aktuallığından qaynaqlanıb.
Qeyd edək ki, hələ keçən ildən başlayaraq Əmək və
Əhalinin Sosial Müdafiəsi Nazirliyi işçilərin distant (məsafədən) iş və ya
teleiş formasında əmək funksiyasının yerinə yetirilməsinin hüquqi əsaslarının
yaradılması istiqamətində işlərə start verib. Belə ki, ilk növbədə Əmək
Məcəlləsindəki əsas anlayışlar sırasına "Distant (məsafədən) iş - əmək
funksiyalarının elektron, proqram-texniki vasitələr əsasında evdə yerinə
yetirilməsi forması” və "Teleiş - əmək funksiyalarının telekommunikasiya
vasitələri əsasında evdə yerinə yetirilməsi forması” anlayışlarının daxil
edilməsi nəzərdə tutulur. Bu sahədə işlər ölkə rəhbərinin 2016-cı il 20
sentyabr tarixli 2345 nömrəli Sərəncamı ilə təsdiq edilmiş "Azərbaycan
Respublikasında informasiya cəmiyyətinin inkişafına dair Milli Strategiyanın
həyata keçirilməsi üzrə 2016-2020-ci illər üçün Dövlət Proqramı”nda nəzərdə
tutulmuş Tədbirlər planına əsasən aparılır. Belə ki, həmin Tədbirlər planında
distant iş və teleiş üzrə dünya təcrübəsinin öyrənilməsi və onun tətbiqi
mexanizmləri ilə bağlı təkliflərin hazırlanması tədbiri də yer alıb.
Milli
Məclisin Əmək və sosial siyasət komitəsinin üzvü Vüqar Bayramovdistant işi pandemiyanın çağırışları ilə əlaqələndirir: "Post-pandemiya
dövründə gözlənilir ki, distant işə, avtomatlaşdırılmış iş rejiminə maraq
artacaq. Çünki pandemiya onlayn menecment və distant idarəetmənin aktuallığını
yenidən gündəmə gətirir. Bu baxımdan, Azərbaycan da distant iş fəaliyyətinə və
onlayn menecmentə xüsusi diqqət ayıran ölkələrdəndir. Məqsəd də ondan ibarətdir
ki, post-pandemiya dövründə daha çox onlayn menecmentlikdən istifadə etməklə,
sahibkarlıq subyektivlərinin idarəedilməsi xidmətlərinə keçid baş tutsun. Eyni
zamanda, dövlət qurumlarında da distant iş fəaliyyəti və menecmentliyin təşviq
edilməsi gözləniləndir. Xüsusən də pandemiya dövründə bu metodlardan istifadə
olundu. Pandemiya, istənilən zaman dünyada gözlənilməyən və ya proqnozlaşdırılmayan
problemlərin yaşana biləcəyini meydana gətirdi. Bu baxımdan, insanların birbaşa
ünsiyyəti və müəssisələrin idarə edilməsində çətinliklər ola bilər. Buna görə
də, onlayn menecmentliyin əhəmiyyətli artırıb. Bunun üçünsə avtomatlaşdırmanın,
informasiya – texnologiyasının daha yaxından istifadə olunması vacibdir”.
Millət vəkili bildirir ki, ölkə prezidentinin "Microsoft” şirkətinin rəhbərliyi
və nümayəndələri ilə görüşündə müzakirə edilən məsələlərdən biri də
Azərbaycanda post-pandemiya dövründə elektron xidmətlərdən daha çox istifadə
olunması və eyni zamanda ölkəmizlə bu şirkət arasında əlaqələrin
genişləndirilməsi ilə bağlıdır: "Azərbaycan, praktik olaraq, regionda dördüncü
sənaye inqilabının mərkəzi hesab olunur. Azərbaycan distant iş və onlayn
menecmentliyin tətbiqində maraqlı olmaqla yanaşı, eyni zamanda, bu prosesdə
potensialı olan ölkədir. Ona görə, gözlənilir ki, post-pandemiya dövründə
avtomatlaşdırılmış və kənardan
idarəetmədən daha çox istifadə olunacaq. Bu da nəticə etibarilə idarəetməyə
fərqli bir yanaşmadır. Proses bu tip pandemiyaların idarəetməyə təsirlərinin
minimallaşdırılmasına imkan verəcək”. V.Bayramovun fikrincə, distant idarəetmə
və onlayn menecmentlik imkan verəcək ki, bu tip pandemiya halları baş verdiyi
təqdirdə də, sahibkarlıq subyektləri tərəfindən onlayn idarəetməni davam
etdirmək mümkün olsun: "Bu, şəffaflıq baxımından da vacibdir. Çünki onlayn
idarəetmə, eyni zamanda şəffaf idarəetmə deməkdir. Eləcə də, xüsusən
sahibkarlıq subyektləri üçün qənaət baxımından da əhəmiyyətlidir. Nəticə
etibarilə vəsaitə qənaət edilməsinə və idarəetmə xərclərinin azaldılmasına
gətirib çıxarır. Ona görə də, post-pandemiya dövründə ölkəmizdə avtomatlaşdırılmış
və kənardan idarəetmənin inkişaf etməsi gözlənilir”.
"Bu mövzuda söhbətlərin gündəmə gəlməsi müsbət
haldır. Sevindiricidir ki, ölkə olaraq bu istiqamətdə gedirik”- deyən sahibkar Elxan Mərdanlınınfikrincə,distant iş telekommunikasiyaların, elektronika və
yeni innovasiyaların yüksək səviyyədə inkişaf etdiyi cəmiyyətlərdə inkişaf
edir. Eyni zamanda, cəmiyyətdəki insanların da savadlılığı bu inkişafa adekvat
olmalıdır: " Belə cəmiyyətlərdə distant iş uğurla nəticələnir. Hazırda ZOOM
proqramı uzunmüddətli proqram olsa da, bizim ölkəmizdə sırf pandemiya zamanı
istifadə olunmağa başladı. Proqramdan bu günə qədər istifadə olunmurdu. Bizdə
kompüterdən istifadə edə bilməyən kifayət qədər işçi heyəti, eyni zamanda,
əllərində olan ağıllı telefonlardan istifadə etməyən kifayət qədər insanlarımız
var. Digər məsələ internetin baha olmasıdır. Həmçinin bunun keyfiyyət məsələsi
də var. Məsələn, təmassız ödəniş 2019-cu ildən Azərbaycanda istifadə olunmağa
başlanılıb. Ancaq bütün bank sektorunda nə bu xidmətdən, nə də mobil
bankçılıqdan istifadə olunur. Təmassız işləmək, onlayn platforma deməkdir. Bu
cür məsələlər Azərbaycanda distant işin inkişafı ilə bağlı problemlər yaradır”.
Sahibkar hesab edir ki, distant iş müəyyən sahələrdə uğurla həyata keçirilə
bilər: "Məsələn, kimsə proqramçıdırsa, onun hansısa bir ofisdə oturub işləməyə
ehtiyacı yoxdur. O, məsafədən işləyə bilər. Çünki onun işi sırf virtual
şəbəkədədir. İT mütəxəssisləri də həmçinin. O cümlədən, mühasibatlıq
elektronlaşsa, kağız daşımağa ehtiyac qalmasa, bu sahə də distant formata keçə
bilər. Distant iş spesifik sahələrə bağlıdır. Müəyyən sahələrdə də dünya artıq
bu sistemi tətbiq edib. Onlayn treninqlər, konsultasiya, İT, mühasibatlıq,
vebinarlar və s. onlayn keçirildikdə, insanların vaxtına da, büdcəsinə də
qənaət edir. Xırdalıqlara baxanda bu prosesin işə dəstəyi var. Ancaq bu, yalnız
spesifik sahələrin inkişafına gətirib çıxara bilər. O cümlədən, dövlət işində
də mümkündür. Məsələn, qəbulları onlayn keçirə bilərlər ki, daha çox insanı
qəbul edə bilsinlər. Məsafədən idarəetməni, faktiki olaraq, bütün sahələrə
şamil etmək olmaz”.
Təranə Məhərrəmova