Seçkiləri demokratik normalara uyğun, şəffaf keçirilib
Dekabrın 23-də Azərbaycanda növbəti bələdiyyə seçkiləri keçirildi.
Ötən illərdəki seçkilərdən fərqli olaraq bu dəfə yerli özünüidarəetmə
orqanlarına maraq daha çox olub. Belə ki, bu ilki 1606 bələdiyyə üzrə 15156
bələdiyyə üzvlüyü üzrə seçkilər keçirilib. Seçkilərdə iştirak edən partiyaların
sayı 13 olub. Namizədlərin 3/1-i 13 siyasi partiyanın nümayəndələri, 3-də 2-si
isə namizədliklərini özləri irəli sürən vətəndaşlardır. Ümumilikdə, bələdiyyə
seçkilərində 41 462 namizəd iştirak edib. Onu da qeyd edək ki, yerli
özünüidarəetmə orqanlarına seçkiləri 17 beynəlxalq, 52 636 yerli müşahidəçi
izləyib.
Açıqlanan məlumatlara görə, seçkilərdə seçici fəallığı 32,72 faiz olub.
Səs vermiş seçicilərin sayı 1 627 064 nəfər təşkil edib. Ümumilikdə isə
səsvermə üçün siyahıya daxil olmuş seçicilərin sayı 4 972 356 nəfərdir.
1606 bələdiyyə üzrə
seçkilər baş tutub
Mərkəzi Seçki
Komissiyasının (MSK) sədri Məzahir Pənahov bələdiyyə seçkilərinə həsr
olunmuş mətbuat konfransında bildirib ki, dekabrın 23-də Azərbaycanda keçirilən
bələdiyyə seçkiləri saat 19.00-da başa çatıb və bütün məntəqələr bağlanıb. Onun
sözlərinə görə, seçkilər 1606 bələdiyyə üzrə 15 min 156 bələdiyyə üzvü yerinə
42 minə yaxın iddiaçının iştirakı ilə keçirilib: "Ölkə üzrə bütün məntəqələr -
118 dairənin 5049 məntəqəsi vaxtında, səhər saat 8-də açılıb. Gün ərzində
səsvermənin gedişi ilə bağlı Mərkəzi Seçki Komissiyası (MSK) 5 dəfə
ictimaiyyəti məlumatlandırıb. Günün sonunda ölkə üzrə seçicilərin 32,72
faizinin səsvermədə iştirak etdiyi məlum olub.
MSK sədri bildirib ki, gün ərzində səsvermə prosesini kütləvi
informasiya vasitələri ictimaiyyətə çatdırıb: "Ümumilikdə bütün məntəqələrdə
səsvermə normal keçib, bu və ya digər xoşagəlməz hadisələrlə bağlı əsasən,
sosial şəbəkələrdə müəyyən məlumatlar yayılıb. Amma MSK-ya bir müraciət daxil
olub. O müraciət aidiyyəti üzrə dairə seçki komissiyasına göndərilib. Çünki
məntəqədə baş verən hadisələrlə bağlı müraciət Seçki Məcəlləsinin tələbinə
görə, ilkin olaraq müvafiq dairə seçki komissiyasına göndərilməlidir. Əgər
iddiaçı dairə seçki komissiyasının qərarından narazı qalarsa, onda MSK-ya müraciət
edə bilər. Ona görə biz Seçki Məcəlləsinin tələbinə uyğun olaraq qərarımızı
verdik. Onu da qeyd edim ki, gün ərzində MSK-ya rəsmi müraciət daxil olmayıb.
Amma sosial şəbəkələrdə yayılan görüntüləri MSK üzvləri artıq ciddi şəkildə
araşdırmağa başlayıblar.
M.Pənahovun sözlərinə görə, ümumilikdə seçkilər sakit şəraitdə keçib,
seçicilərin öz iradələrini ifadə etmələri üçün hər cür şərait yaradılıb, onlar
da bundan lazımi qaydada istifadə ediblər: "Yekunda 1606 bələdiyyə üzrə
səsvermə baş tutub. Hazırda 4556 məntəqədən məlumatlar MSK-nın bazasına daxil
olub. Bu da ölkə üzrə ümumi məntəqələrin 90,24 faizi deməkdir. Beləliklə, 1475
bələdiyyə üzrə məlumatlar hazırda MSK-nın bazasındadır. Bu, ölkə üzrə mövcud
bələdiyyələrin 91,84 faizidir. Yəni, deyə bilərik ki, 1375 bələdiyyə üzrə ilkin
nəticələrə görə üzvlərin hamısı artıq məlumdur. Bu, ölkə üzrə mövcud olan
bələdiyyələrin 85,62 faizidir. İlkin nəticələrə görə, tam formalaşmış
bələdiyyələrdə liderlik edən namizədlərin sayı 12 min 930 nəfərdir. Yəni, bu,
ümumilikdə seçiləcək 15 min 156 bələdiyyə üzvünün 85,31 faizini təşkil edir.
Gün ərzində MSK-nın 115 - "qaynar xətt”inə 220 müraciət daxil olub. Bunlardan
90-nı seçici siyahısı və məntəqələrin ünvanları ilə bağlı sorğulardır. 130
müraciət isə hüquqi məsələlərlə bağlı və məlumatlandırma xarakterli olub”.
MSK sədri deyib ki, səsvermə məntəqələrinin 1000-də, yəni, təxminən
20 faizə yaxınında veb-kameralar quraşdırılmışdır: "Bu veb-kameralara gün
ərzində 198069 müraciət olub. Bunlardan 130218-i, yəni, 65,7 faizi ölkə
daxilindən, 67851-i isə (34,3 faizi) xaricdən olub. Bu, çox diqqətçəkən
rəqəmdir. Yəni, bu, seçkilərə kifayət qədər diqqətin olmasının göstəricisidir.
Bundan əlavə, Mərkəzi Seçki Komissiyasının internet səhifəsindən istifadəçi
sayı 282627 nəfər olub. Bu da ictimaiyyətin seçkilərə marağının
göstəricisidir”. "Yeni Azərbaycan
Partiyasına əhali arasında rəğbət artır”
Yeni Azərbaycan Partyasının
Sədr müavini-İcra katibi, Baş nazirin müavini Əli Əhmədov bələdiyyə
seçiləri ilə bağlı bildirib ki, dekabrın 23-də Azərbaycanda növbəti bələdiyyə
seçkiləri keçirilib və Yeni Azərbaycan Partiyası da bu seçkilərdə iştirak edib.
Ə.Əhmədovun sözlərinə görə, Mərkəzi Seçki Komissiyası tərəfindən
ilkin nəticələr elan olunub: "Lakin bizim seçki məntəqələrində olan
müşahidəçilərimizin apardığı müşahidələrə əsasən deyə bilərəm ki, YAP-ın
bələdiyyə seçkilərində namizədləri seçicilərin çoxunun dəstəyini qazanıb.
İnsanların rifahının yaxşılaşması ilə əlaqədar Prezidentin təşəbbüsü ilə böyük
sosial layihələrin həyata keçirilməsi insanlar tərəfindən yüksək
qiymətləndirilir və YAP-a əhali arasında rəğbət artırır. Mən Yeni Azərbaycan
Partiyasını əldə etdiyi qələbəyə görə təbrik etmək istəyirəm”.
"Seçkiləri demokratik
normalara uyğun, şəffaf keçirilib”
Azərbaycanda Vətəndaş Cəmiyyətinin İnkişafına Yardım Assosiasiyası
(AVCİYA) bələdiyyə seçkiləri ilə əlaqədar ilkin hesabatını açıqlayıb.
AVCİYA Seçki Qərargahının
rəhbəri Məhərrəm Zülfüqarlı qeyd edib ki, seçki ərəfəsi mövcud olan
ictimai-siyasi mühit ölkədə azad və şəffaf seçkilərin keçirilməsinə imkan
verib. Səsvermə günü 5 dəfə (saat 10.00, 12.00, 15.00, 17.00, 19.00)
məntəqələrdəki seçici fəallığının vəziyyəti, müşahidə olunan qanun pozuntuları
barədə məlumatlar AVCİYA Seçki Qərargahında toplanaraq ümumiləşdirilib: "AVCİYA-nın
bələdiyyə seçkilərindəki müşahidəsinin nəticələri onu deməyə əsas verir ki,
müşahidə aparılmış məntəqələrdə seçici fəallığı 39,75 faiz təşkil edib. Seçki
günü ölkə üzrə bir neçə məntəqədə bəzi çatışmazlıqlar müşahidəçilərimiz
tərəfindən qeydə alınıb. Qeydə alınan faktlarla bağlı dərhal məntəqə sədrləri
ilə əlaqə saxlanılıb, nöqsanlar aradan qaldırılıb. Bu cür çatışmazlıqlar
seçkilərin ümumi nəticələrinə təsir etmək gücündə olmayıb.
Beləliklə, AVCİYA həyata keçirdiyi müşahidənin nəticələrinə
əsaslanaraq dekabrın 23-də keçirilmiş bələdiyyə seçkilərini baş tutmuş hesab
edir. Assosiasiya bu qənaətdədir ki, seçkilər qanunvericiliyə, demokratik
normalara uyğun, şəffaf keçirilib”. "Bələdiyyələr bugünkü
çağırışa uyğun öz fəaliyyətlərini quracaqlar”
"Kaspi”yə açıqlamasında Milli
Məclisin deputatı Azər Badamov bildirdi ki, bələdiyyə seçkilərində şəxsən
özü də iştirak edib və səs verib: "Seçkilərdə insanların aktivliyi hiss
olunurdu. Görünən o idi ki, insanlar özlərinə yaxın namizədlərdən istəklərinə
uyğun bələdiyyə formalaşdırmağa çalışırlar. Düşünürəm ki, seçkilərdə qələbə
əldə etmiş bələdiyyə üzvləri öz fəaliyyətlərini bugünkü Azərbaycanın çağırışına
uyğun quracaqlar və seçicilərin etimadını doğrultacaqlar. Təbii ki, bələdiyyə
seçkilərində Yeni Azərbaycan Partiyası qalib gəlib. Əlbəttə, YAP qaliblər
partiyasıdır və kifayət qədər sosial bazaya malik olduğundan bələdiyyə
seçkilərində də qalib gəlib. Əminəm ki, gələcək seçkilərdə də YAP-ın qələbələrini
görəcəyik”.
A.Badamov qeyd etdi ki, bələdiyyələr yeni formalaşmış yerli
özünüidarəetmə orqanlarıdır: "Bələdiyyələr cəmi 20 ildir fəaliyyət göstərirlər.
Ondan əvvəl isə Azərbaycanda bu institut olmayıb. Lakin ötən müddət ərzində
bələdiyyələrin fəaliyyət göstərməsi və özlərini doğrultması üçün tam
qanunvericilik bazası hazırlanıb. Bu qanunvericilik bazası dünyanın inkişaf
etmiş ölkələrindəki bələdiyyələrin qanunvericilik bazasına və təcrübəsinə
uyğunlaşdırılıb. Yəni bu gün Azərbaycanda bələdiyyələrin hərtərəfli fəaliyyətini
təmin edən bir qanunvericilik bazası mövcuddur. Düşünürəm ki, yeni bələdiyyələr
bu qanunvericilik bazasını öyrənəcək, maariflənəcək və öz fəaliyyətlərini bu
prinsiplər əsasında quracaqlar. Hesab edirəm ki, ölkəmizdəki mövcud qanunlarda
bələdiyyələrin fəaliyyət göstərməsi, onların maliyyə resurslarının yaradılması
üçün bütün imkanlar nəzərdə tutulub. Bu imkanlardan səmərəli istifadə edilməsi
bələdiyyələrin büdcələrini də əhəmiyyətli formada formalaşmasına imkan
yaradacaq. Yerli özünüidarəetmə orqanlarının büdcələrinin formalaşması yerli
problemlərin həlli istiqamətində addımların atılmasına imkan verəcək”.
Bakı 25°C
