Putin və Ərdoğan kritik görüşə hazırlaşır
Suriyada gərginliyin güclənməsi, eləcə də kürdlərin İraqda
müstəqillik referendumu Türkiyə və Rusiya prezidentləri – Rəcəb Tayyib Ərdoğan
və Vladimir Putinin bu gün Ankarada keçiriləcək danışıqlarında əsas müzakirə
mövzusu olacaq. Bundan əlavə, S-400-lər, ikitərəfli ticarət-iqtisadi
münasibətlər, xüsusən də Türkiyə pomidorlarının Rusiyaya ixracı, "Türk axını”
layihəsinin reallaşması, "Akkuyu” AES-in inşası məsələsinin də diqqət
mərkəzində olacağı bildirilir.
Türkiyə mətbuatı yazır ki, liderlərin ən çox diqqət yetirəcəyi məsələ
Suriya dövlətinin gələcəyi ilə bağlı olacaq. Eləcə də İŞİD-lə də bağlı məsələ
gündəmdə olacaq. Bu terror təşkilatına nə vaxt son qoyulacaq, eləcə də suriyalı
kürdlərlə bağlı hansı addımlar atılacaq? Bu suallara hələ də cavab tapılmır. Yeri
gəlmişkən, bir neçə gün bundan əvvəl prezidentlər arasında telefon danışığı da
baş tutub. Prezidentlərin telefon danışığının gündəliyində Astanada sentyabrın
15-də keçirilən sayca altıncı görüş müzakirə mövzusu olub. "Suriyada dörd
təhlükəsizlik zonasının yaradılmasının vətəndaş müharibəsinə son qoyulmasına,
ölkənin ərazi bütövlüyünün və suverenliyinin qorunması prinsipləri əsasında
siyasi cəhətdən nizamlanmasına yol aça biləcəyi vurğulanıb”, - deyə Kremlin
mətbuat xidmətinin yaydığı məlumatda qeyd olunur.
Gəlinən qənaət budur ki, suriyalı kürdlər ciddi hərbi qüvvəyə
çevrilib.
Beləliklə, əksər politoloq və ekspertlər prezidentlərin görüşünü çox
aktual hesab edirlər. Xüsusən də Yaxın Şərqdə ABŞ, İsrail və başqa bir sıra
dövlətlərin sərhədləri yenidən biçmək istəyi qarşılığında hansı addımların
atıla biləcəyi diqqət mövzusudur. Hazırda ən təhlükəli məsələ kürd dövlətinin
yaradılmasından ibarət ideyadır. Heç kimə sirr deyil ki, Kürd Muxtariyyətinin
lideri Bərzaninin özündənrazı şəkildə belə bir referendum keçirməsi ona verilən
gizli dəstəklə bağlıdır. İndi bölgə dövlətləri İraqın tarixi sərhədlərinin
pozulmasının qarşısını almaq üçün bir araya gəliblər. Söhbət İran, İraq və
Türkiyədən gedir. Rusiyaya gəldikdə, bu dövlət son günlərə qədər bir qədər
neytrallıq nümayiş etdirir. Halbuki, bölgədə artıq Türkiyə, İraq və İran
arasında ciddi razılaşma əldə edilib. Belə bir fikir də var ki, Rusiyanın da bu
razılaşmaya qatılması, xüsusilə xarici işlər naziri Sergey Lavrovun ötən gün İraqın
ərazi bütövlüyü ilə bağlı bəyanat verməsi Suriya daxil olmaqla, Yaxın Şərq
dövlətlərinin ərazi bütövlüyü uğrunda mübarizəyə dördüncü dövlətin daxil ola
biləcəyindən xəbər verir. Söhbət prinsipcə mərkəzi qüvvələr nisbətinin
yaranmasından gedir. Bir tərəfdə Amerika, İsrail və onların tərəfində olan
əsasən Qərb dövlətləri, digər tərəfdə isə NATO üzvü olan Türkiyə, o cümlədən İran,
İraq və Rusiya dayanıb. Gəlinən qənaət budur ki, Rusiyanın bu proseslərə
müdaxilə etməsi işləri daha da canlandıracaq və İraqın ərazi bütövlüyünü
bərqərar etmək mümkün olacaq. Lakin məsələ ondadır ki, Türkiyə ilə Rusiyanın
Suriya ilə bağlı mövqelərində problemlər yarana bilər. Qeyd edilir ki, məhz
Suriyadakı gərginlik də prezidentlər arasında telefon danışığının baş tutmasına
səbəb olub. İdlib vilayətində cihadçıların hücumları Rusiya Hərbi Hava
Qüvvələrinin və Bəşər Əsəd qüvvələrinin sərt cavabı ilə nəticələnib.
Ekspertlər qeyd edir ki, Ankara və Moskva arasında yeni bir problem
ortaya çıxıb – Suriya üsyançılarına etimadsızlıq. Rusiyanı İdlibdə həyata
keçirdiyi bombardmanlarla müxalifəti hədəf almaqda ittiham edirlər.
Məsələn,
Türkiyənin "Akşam” qəzeti yazır ki, Türkiyə, Rusiya və İranın Astanada Suriya
münaqişəsinin nizamlanması ilə bağlı keçirdikləri altıncı görüş üç ölkə
arasında strateji əməkdaşlığın göstəricisidir. "Bu onu deməyə əsas verir ki,
onlar Vaşinqtona Yaxın Şərqdə ağalıq etməyə imkan verməyəcəklər”, - deyə qəzet
yazır. Bu razılaşmalara uyğun olaraq İdlibdə Türkiyə qarşısında əsas məsələ "Əl-Qaidə”
ilə bağlı olan "Həyat Təhrir aş-Şam” qruplaşmasının zərərsizləşdirilməsi
olacaq. "Nə Rusiya, nə də Suriya ordusu İdlibdə və Hələbdə küçə döyüşlərinin
aylarla, hətta illərlə uzanmasını istəmir. Bu səbəbdən də İdlibdə daha qısa bir
həll yolu axtarılır. Bu məsələdə isə Ankara öz töhfəsini verə bilər”, - qəzet vurğulayır.
Bəs Ankara bunun əvəzində nə əldə edə bilər? Türkiyəyə kürdlərin nəzarət etdiyi
əraziləri onlardan geri almağa imkan verərlərmi? Bu kimi məsələlərin Astanada
keçirilən görüşlərin pərdəarxası məqamları olduğu vurğulanır.
"Günəş”
qəzeti isə yazır ki, Türkiyə Astanada keçirilən danışıqlarda istədiyini aldı. "Rusiya
bunun nəticəsidir ki, Deyr-əz-Zorda kürd YPG qruplaşmasını bombardman etdi.
Nəticədə, ABŞ-ın dəstək verdiyi YPG Suriyanın cənubuna doğru irəliləməyə imkan
tapmadı. Məhz bundan sonra Fərat çayı yaxınlığındakı neft yataqlarına kürdlərin
Demokratik İttifaq – PYD-nin yaxınlaşmasına imkan verilmədi. "Hürriyet” yazır
ki, Ankaranın Suriya siyasətinin dəyişməsi, Moskva və Tehranla yaxınlaşma - Türkiyənin
mili təhlükəsizliyinə olan təhlükədən irəli gəlir: "Bütün bunlar isə Astana
prosesi çərçivəsində baş verib”. "Karar” nəşri isə yazır ki, Türkiyə və Rusiya
tək İdliblə deyil, Afrinlə də bağlı razılaşıb. Buna müvafiq olaraq Rusiya
regionu azad edir və burada Türkiyə hərbçiləri yerləşdiriləcək.
Beləliklə, diqqət Ərdoğan-Putin görüşünə yönəlib. Türkiyə üçün əsas
məsələ kürd referendumu məsələsində Rusiyanın tutacağı mövqedir. Böyük
ehtimalla Kreml rəhbəri kürd məsələsində İran-Türkiyə-İraq birliyinə doğru
hərəkət edəcək. Əks təqdirdə, bu ölkələrlə münasibətləri zəifləyə bilər. Bu isə
indiki halda ona sərf etmir.
Azər