20 Yanvar ədəbiyyatda dolğun əks olunub?
Azərbaycan xalqının tarixinə Qanlı Yanvar faciəsi kimi daxil olmuş
1990-cı il 20 Yanvar hadisələrindən artıq iyirmi doqquz il keçir. Keçmiş sovet
dövlətinin hərb maşınının həmin gün Azərbaycan xalqına qarşı həyata keçirdiyi təcavüz
insanlığa qarşı törədilmiş ən ağır cinayətlərdən biri kimi qalacaq. Milli
azadlıq və ərazi bütövlüyü uğrunda mübarizəyə qalxmış dinc əhaliyə silahlı təcavüz
nəticəsində yüzlərlə günahsız insanın qətlə yetirilməsi və yaralanması
totalitar sovet rejiminin süqutu ərəfəsində, onun cinayətkar mahiyyətini bütün
dünyaya bir daha nümayiş etdirdi.
Təəssüf ki, ədəbiyyatda həllini tapmayıb
Real tarixi şəxsiyyətlərin bədii obrazlarını yaratmaq
İnsan insan olur öz hünəriylə,
Millət, millət olur xeyri-şəriylə,
Torpağın bağrına cəsədləriylə,
Azadlıq toxumu əkdi şəhidlər.
Təranə Məhərrəmova
Faciənin unudulmaması, yaddaşlarda yaşaması üçün elmi, siyasi təhlillər
aparılmaqdadır. Bədii ədəbiyyat da öz növbəsində 20 Yanvar faciəsinin
unudulmaması, tarixə dərs üçün öz səhifələrində yer ayırır.
Qanlı Yanvarın ədəbiyyatda necə işıqlandırılması haqqında "Müzakirə”mizdəki
söhbətdə, mövzu ilə bağlı əsərlərə hələ çox ehtiyac olduğunu öyrəndik.
Qəhrəmanlıq tariximizi yadda saxlamalı
Şair Musa Ələkbərli 20 Yanvar
faciəsi ilə bağlı çoxlu yazıların, şeirlərin yazıldığını deyir: "Məmməd Aslanın
«Ağla, qərənfil, ağla» şeiri bu mövzuda yazılan ən layiqli şeirdir. «Bu qan
yerdə qala bilməz» kimi şeirlər yazan şairlərimiz də var. O cümlədən, mən də
daxil olmaqla, bütün şairlərimiz bu mövzuya müraciət ediblər. Bu, elə bir
mövzudur ki, daim onun haqqında yazılmalıdır. Bu hadisələri yaddan çıxarmaq, öz
tariximizi unutmağa bərabərdir. Biz bir qələm adamı olaraq bu mövzunu daim gündəlikdə
saxlamalıyıq. Çünki Azərbaycan xalqına bir tarixi dərs idi. Hadisənin içində həm
də xalqımızın qəhrəmanlığı yaşayır”. M.Ələkbərli hesab edir ki, düşmənlə üzbəüz
olduğumuz üçün, torpaqlarımız 20 faizi işğal olduğundan bu mövzunu
qabartmalıyıq ki, xalqımızın qəhrəmanlıq səhifələrindən hamı xəbərdar olsun:
"Eyni zamanda, tankların üzərinə əliyalın gedən xalqımızın döyüşkənliyi, vətən
sevgisi dünyaya əyan olsun”. Şairin fikrincə, biz 20 Yanvar faciəsinə birmənalı
şəkildə müsibət kimi də baxmalı deyilik: "Sonradan siyasi dairələrdə bunu
xalqımızın qəhrəmanlıq salnaməsi olduğunu təsdiq etdilər. Biz bu baxımdan qəhrəmanlıq
tariximizi yadda saxlamalı, həmçinin gündəmdə qalması üçün onun təbliği ilə məşğul
olmalıyıq».
Faciənin fərqli formada təqdimatı
"20 Yanvarı qəhrəmanlıq
dastanı da, faciə də adlandırırlar”- deyən
yazıçı-dramaturq Elçin Hüseynbəylinin fikrincə, bu hadisələrlə bağlı xeyli
yazılar yazılıb: "Mən düşünürəm ki, millət
faciə ilə yaşamamalı, faciəni unutmamaq üçün həmişə xatırlamalıdır. Bəlkə də bu
faciəni başqa bir formada, fərqli məzmunda gəncliyə təqdim etmək lazımdır. Adətən
televiziyada həmin faciə günləri hüznlü verilişlər yayımlanır. Mənə elə gəlir
ki, bu, milləti ucaltmır. Milləti ucaltmaq üçün bu hadisələrin düzgün təqdimatlarını
tapmaq lazımdır. Təbii ki, 20 Yanvar hadisəsi zamanı həlak olan insanlar
xatırlanmalı, onlar haqqında yazılmalıdır. Hadisənin üstündən çox vaxt keçir. Mənə
elə gəlir ki, bunun təqdim olunması üçün yeni yollar tapılmalı, məsələn, 20
Yanvar faciəsini başqa formada təqdim etmək lazımdır”. Belə bir təqdimatla
bağlı hazır reseptinin olmadığını deyən yazıçı, bu mövzuda öz yazılarında
nikbin notlar yaratmağa çalışdığını deyir: "Ona görə, bu hadisəyə qiymət vermək
çox çətindir, eyni zamanda yerində saymaq da düzgün deyil. Bəli, biz belə millətik,
yeri gələndə tankların üzərinə əliyalın da getmişik. Bizə qarşı bu ədalətsizliyi
ediblər – bunlar hamısı aydındır. Sadəcə, bunları təqdim etməyin forması
olmalıdır. Bu hadisələrin içərisində sevgi məsələsi ola bilər. Məsələn, İlhamla
Fərizə kimi. Onların faciəsi üzərində bəlkə nəsə qurmaq daha məntiqli olar.
Faciənin özündə də bir gözəllik var. Söhbət estetik gözəllikdən gedir. «Romeo və
Cülyetta», «Leyli və Məcnun»da da belə gözəllik var. Mənə elə gəlir ki, 20
Yanvar hadisələrinin təqdimatı bir qədər geniş spektrli düşüncə tələb edir. Bu
baxımdan, 20 Yanvar faciəsinin təqdimatı
şəxsən məni qane etmir».
Təəssüf ki, ədəbiyyatda həllini tapmayıb
20 Yanvar faciəsini
Azərbaycan xalqının həyatında ən önəmli günlərdən hesab edən yazıçı Orxan Fikrətoğlu həmçinin o günü ən
sevincli gün adlandırır: "O insanlar bir günün içində bir xalqa çevrildilər –
bu, əslində sevincli bir gündür”. O.Fikrətoğlu ssenarisi əsasında rejissor Gülbəniz
Əzimzadənin çəkdiyi «Ümid» filmini 20
Yanvar hadisələrinin sənədli şəkildə təqdimatı kimi dəyərləndirir: "Hadisələrin
Azərbaycan ədəbiyyatında yer almasına gəlincə, hesab edirəm ki, proses hələ
davam edir. Heç bir azərbaycanlı üçün bu proses hələ bitməyib. İşğal olunmuş
torpaqların geri qaytarılması, hər kəsin bir vətəndaş olaraq borcudur. Bu
proses bitmədiyindən, Azərbaycan ədəbiyyatı da bu gerçəkliyi hələ həzm edə bilməyib.
Ona görə də, 20 Yanvar faciəsi Azərbaycan ədəbiyyatında yoxdur. 20 Yanvar faciəsinin
kiçik qəhrəmanlarını, ola bilsin ki, sənədli filmlərdə, publisistik yazılarda və
ya digər bədii nümunələrdə kimlərsə gündəmə gətirməyə çalışıb. Ancaq rəmz
olaraq ortaya qoyulası ciddi bir əsər yazılmayıb. Təəssüf ki, o dövrdə baş verən
hadisələr sənədli şəkildə də gündəmə gətirilməyib. Primakovun Azərbaycana gəlməsi,
ölkədə baş verən vəziyyət, sovet qoşunlarının Azərbaycana guya "rezervistlər” şəklində
daxil olması, əliyalın xalqın üzərinə tank yeritmək - sovet təfəkkürlü
insanların törətdiyi faciə bəlkə də dünya tarixinə düşəcək hadisələrdir. Bizim
xalqın şücaəti də tarixə düşməyə layiqdir”. Həmin proseslərin iştirakçısı
olduğunu deyən yazıçı, baş verən hadisələri heç vaxt unutmadığını deyir: "Mən o
hadisələri şərəfli gün kimi xatırlayıram. Təəssüf ki, ədəbiyyatda o hadisələr həllini
tapmayıb».
Real tarixi şəxsiyyətlərin bədii obrazlarını yaratmaq
Tənqidçi Əsəd Cahangir 20 Yanvar faciəsi ilə bağlı kifayət qədər əsərlərin
yazıldığını deyir. Belə ki, bu əsərlər bir neçə mərhələdən keçib. İlk mərhələdə
yalnız 20 Yanvarın dəhşəti, bu faciədən doğan ağrı təsvir olunub: "Həmin əsərlərdə
emosionallıq mövcud idi. Onların bariz nümunəsi Məmməd Aslanın «Ağla, qərənfil,
ağla» şeiri idi: "Ağlamalı gün gəldi, ağla, qərənfil, ağla”- deyə şair yazırdı.
Zaman keçdikcə həmin emosiyalar nisbətən sakitləşir, 20 Yanvar hadisələrinin siyasi, elmi dərki prosesləri başlayır. Bu, bədii
ədəbiyyatda da öz əksini tapır. Bu bədii dərkin ən bariz nümunəsi Bəxtiyar
Vahabzadənin «Şəhidlər» poeması idi. Burada şəhidliyin təkcə faciəsi, ağrısı
yox, həm də ümummilli təfəkkürdə oynadığı rol öz əksini tapır. Məsələn, Bəxtiyar
Vahabzadə deyirdi:
İnsan insan olur öz hünəriylə,
Millət, millət olur xeyri-şəriylə,
Torpağın bağrına cəsədləriylə,
Azadlıq toxumu əkdi şəhidlər.
Bu misralarda təkcə
şəhidliyin faciəsi yox, gələcək azadlıq uğrunda mücadilələrdə şəhidlərin
oynadığı böyük rol öz əksini tapır. Yəni bu şəhidlik boşuna verilməmişdi. Bu, təkcə
faciə deyildi, həm də gələcək qələbələrin qazanılması üçün, milli-bədii təfəkkürün
düşüncəsinə qoyulan mənəvi-psixoloji baza idi. Şair demək istəyir ki, torpağa əkilən
toxumlar nə vaxtsa bar verdiyi kimi, torpağın bağrına verilən cəsədlər də,
onların əməl və ideyaları da gələcəkdə öz bəhrəsini verəcək”. Tənqidçi bildirir
ki, bizim sonrakı poeziya və nəsrimizdə, eləcə də publisistikamızda çox sayda
20 Yanvara həsr olunan əsərlər yazılıb: "Ancaq mənə elə gəlir ki, şəhidlər
haqqında həmişə yazmaq lazımdır. İmam Hüseynin şəhadəti 681-ci ildə olub.
Üstündən 1000 il keçəndən sonra Füzuli onun haqqında «Şühadətnamə» yazıb. Yəni
bu, elə bir əbədi mövzudur ki, «Artıq bu mövzu işlənib», "Bu mövzuya nöqtə
qoyulub” sözlərini heç vaxt demək olmaz. Çünki şəhidlik 20 Yanvarla başlamır və
bu hadisələrlə də bitməyəcək. Şəhidlik insanın öz əqidəsi, azadlığı uğrunda
ölümü könüllü surətdə qəbul etməsi və ucalması prosesidir. Bir neçə il bundan əvvəl
Mübariz İbrahimovun qəhrəmancasına şəhid olması göstərdi ki, Azərbaycan
xalqının şəhadət ruhu, öz əqidəsi və azadlığı uğurunda ölümü könüllü seçmək əzmi
və qətiyyəti 20 Yanvar hadisəsi ilə məhdudlaşmır”.
Ə.Cahangir hesab edir ki, bu
hadisələr zaman-zaman ədəbiyyatda da öz əksini tapmalıdır: "Zaman bu qəhrəmanları
ədəbiyyata təqdim edib. Məsələn, elə Mübariz İbrahimovun qəhrəmanlığına nəzər
salaq. İndi ədəbiyyatın borcu real tarixi şəxsiyyətlərin bədii obrazlarını
yaratmaqdan ibarətdir: "Mən demirəm ki, bizim ºair və yazıçılarımız bu mövzuda
yazmırlar, ədəbiyyat bu mövzuya laqeyddir. Bu, onlarla qələm sahibinin zəhmətinin
üstündən xətt çəkmək demək olardı. Mənə elə gəlir ki, şəhidlik mövzusu, eləcə də
20 Yanvar şəhidlərinin bədii obrazları, onların qəhrəmanlığının fəlsəfi mahiyyəti
hələ özünün dolğun bədii əksini gözləyir”. Tənqidçi hesab edir ki, gənc
yazarlar da bu mövzuya diqqətlə yanaşmalıdırlar: "Bu mövzuda yazmaq üçün ilk
növbədə onlarda ümummilli şüur olmalıdır. Onlar ümummilli, taleyüklü problemlərlə
maraqlanmalıdırlar. Bu isə onların ailədə, uşaq bağçasında, məktəbdə aldıqları
tərbiyədən, etdikləri mütaliədən, izlədikləri televiziya proqramlarından
asılıdır. Ona görə, ailədən tutmuş ali məktəbə qədər, gənclər vətənpərvərlik
ruhunda tərbiyə olunmalıdırlar ki, onların içərisindən çıxan şair və
yazıçılarda da bu mövzuya maraq olsun. Bilavasitə bu hadisənin şahidi olan
yazarlar o dövrün hadisələrini təsirli bədii şəkildə qələmə alıb gəncliyə təqdim
etməlidirlər ki, gənclər özləri o hadisələri birbaşa görməsələr də, necə olması
barədə heç olmasa təsəvvürləri olsun. Və bu barədə bədii mətnlərdən məlumat əldə
edə bilsinlər”. Ə.Cahangir hesab edir ki, bu mövzuda filmlər çəkilməli, gənclərin
diqqətini cəlb etmək üçün ədəbiyyat müsabiqələri təşkil edilməlidir. Məsələn,
20 Yanvar mövzusunda yazılan ən yaxşı şeir, roman, publisistik yazı, məqalə,
hekayə və s. janrlarda müsabiqələr təşkil etməklə gənclərin diqqətini bu
mövzuya yönəltmək mümkün olar: "Gənclər o zaman istər-istəməz, oxuyacaq,
baxmadıqları kitablara baxacaq, mövzunun dərinliklərini axtaracaqlar».
Təranə Məhərrəmova