143 illik şərəfli tarix
Hadisələrə obyektiv yanaşan, gizli mətləblərin gün üzünə çıxmasında
böyük rolu olan, bəzən insanları düşündürən, bəzən isə yol göstərən
jurnalistlərin bayramıdır. 143 illik tarixi olan Azərbaycan jurnalistikası bu
gün özünün yeni mərhələsini yaşayır. Hər nə qədər zaman dəyişsə də, çağdaş jurnalistikanın nümayəndələri təməl
prinsiplərə və missiyalara söykənərək fəaliyyətlərini davam etdirirlər. Biz də
143 illik şərəfli və çətin yol keçən mətbuatın ad günündə media kapitanlarının
təəssüratlarını öyrəndik.
"Bu, mətbuatın qələbəsidir”
APA agentliyinin baş direktoru Vüsalə Mahirqızı "Kaspi”yə
açıqlamasında bayram münasibətilə həmkarlarını təbrik etdi və 143 ildə
Azərbaycan mediasının kifayət qədər böyük mərhələlər keçdiyini vurğuladı: "Bu
günə gələnə qədər biz yazmağın qadağan olduğunu, mətbuatın senzuraya məruz
qaldığını, təqib olunduğunu, Həsən bəy Zərdabidən indiyə qədər qəzet çıxarmağın
nə qədər çətin iş olduğunu görmüşük. Amma müasir media senzurasız fəaliyyət
göstərir, bu gün Azərbaycanda medianı hansısa dövlət strukturu nəzarətdə
saxlamır, özünənəzarət mexanizmi olan Mətbuat Şurası vasitəsilə media özü özünü
idarə edir. Eyni zamanda media cəmiyyətə ictimai nəzarət funksiyasını həyata
keçirir, azad internetin olduğu bir ölkədə fəaliyyət göstərir. Bu, bizim
mətbuatımızın qələbəsidir”.
Həmsöhbətimiz vurğuladı ki,
143 illik dövrdə Azərbaycanda jurnalistika məktəbi yaranıb: "Həsən bəy
Zərdabidən sonra ənənəsi olan onlarla məşhur jurnalistlərimiz, qəzetlərimiz
var. Onlardan biri də elə "Kaspi”dir. Müstəqillik dövründə uzun müddətli
fəaliyyət göstərən media qurumlarımız
var ki, artıq özlərinin məktəbini formalaşdırıblar. Artıq mediada bizi dünyada
tanıda biləcək jurnalistlərimiz yetişir, kifayət qədər sanballı media
qurumlarımız fəaliyyət göstərir. Onlar təkcə özləri üçün deyil, digər media
qurumlarına da kadr ixrac etməklə məşğuldurlar. Yəni bütün bunların hamısı
böyük ənənələrdir. Ənənələrin, məktəblərin yaranması ölkə mediasının tarixi
üçün mühüm prosesdir”.
Azərbaycan mətbuatının gələcəyindən danışan media kapitanı bütün
jurnalistləri təbrik etdi və medianın daha rəngarəng olmasını arzuladı: "Sosial
şəbəkələrin mediaya inteqrasiyası, cəmiyyəti çaxnaşmaya salan xəbərlərin
yayılması bütün dünyada müzakirə edilən məsələlərdir. Arzu edirəm ki, sosial
şəbəkələr üzərindən xəbərlər vasitəsilə nifrətə, kinə çağırışların qarşısı
alınsın və Azərbaycan mediası da dünyada gedən bu cür müzakirələrdə aktiv
iştirak etsin. Mediamızın beynəlxalq müstəviyə inteqrasiyasını arzu edirəm”.
"Mətbuat millətin inkişaf
tarixində təkanverici mərhələdir”
"Yeni Azərbaycan” qəzetinin baş redaktoru, Milli Məclisin deputatı
Hikmət Babaoğlu mətbuatın inkişaf tarixində uzun və mürəkkəb yol keçdiyini
vurğuladı: "Ümumiyyətlə, mətbuatın ictimai institut kimi formalaşması tarixi o
qədər qədim olmasa da, sevindirici haldır ki, Azərbaycanın mətbuat tarixi Orta
Asiya və Şərqi Avropa ölkələri sırasında birincilərdəndir. Mətbuat, ilk
növbədə, intellektual sfera olduğu üçün, heç şübhəsiz ki, onun formalaşmasını
təmin edəcək intellektlərin, ziyalıların, qələm sahiblərinin, yazarların
olması, bunun üçünsə, əlbəttə ki, cəmiyyətin bu cür insanları yetişdirməsi
vacibdir. Əgər hər hansı bir sosium bu işin öhdəsindən tarixi missiya olaraq
vaxtında gəlmirsə, o ölkələrin mətbuatının inkişafı da, tarixi də bir qədər
daha sonrakı dövrlərə təsadüf edir. Ancaq heç şübhəsiz ki, gec və ya tez
olmasından asılı olmayaraq, hər bir millətin milli mətbuatı onun inkişaf tarixində
təkanverici bir mərhələdir. Çünki mətbuat milli kimliyi formalaşdıran vasitə
olmaqla bərabər, eyni zamanda, milli maarifləndirməni həyata keçirir, milli
mentalitetin formalaşmasında aparıcı komponentlərdən biri kimi iştirak edir. Bu
mənada, Azərbaycan mətbuatının tarixinin məhz 1875-ci ildən başlanması onun
göstəricisidir ki, Azərbaycan xalqı hələ o dövrdə mətbuat nümunələrini ortaya
qoya biləcək ziyalıları yetişdirmək iqtidarında olan intellektual gücə və
potensiala sahib bir xalq, Azərbaycan cəmiyyəti isə hələ o dövrdə kifayət qədər
intellektual əsaslarda formalaşan bir sosium idi”.
H.Babaoğlu ölkədə KİV-in və jurnalistlərin problemlərinin həlli
istiqamətində xüsusi tədbirlər görüldüyünü vurğuladı: "Jurnalistlərin dostu
olan Prezident İlham Əliyev mətbuat işçilərinin mənzil probleminin həll edilməsi
ilə bağlı Sərəncam verdi. 2013-cü ildə dövlət başçısının iştirakı ilə
jurnalistlər üçün 156 mənzilli bina, 2017-ci ildə isə 255 mənzilli bina
istifadəyə verildi. Hazırda isə üçüncü yaşayış binasının tikintisi davam edir.
Bütün bunlar jurnalistlərə münasibətdə yüksək səviyyəli qayğının zirvəsidir.
Çünki Müstəqil Dövlətlər Birliyi məkanında heç bir dövlət başçısı tərəfindən
mətbuata bu qədər yüksək qayğı və diqqət göstərilməyib. 143 yaşlı milli
mətbuatımız ötən zaman ərzində böyük inkişaf yolu keçib. Bu gün isə mətbuata
xüsusi dövlət qayğısı və diqqətinin mövcud olması, eyni zamanda, söz, fikir və
özünüifadə azadlıqlarının ən yüksək səviyyədə təsbit edilməsi, mətbuatın
maddi-texniki və maliyyə bazasının gücləndirilməsi, media institutunda təmsil
olunan şəxslərin səmərəli fəaliyyəti üçün əlverişli şəraitin yaradılması və
digər bu kimi amillər milli mətbuatımızın inkişafını şərtləndirən fundamental
faktorlar kimi dəyərləndirilməlidir”.
"Senzuranın ləğvi
Azərbaycan mətbuat tarixində şərəfli hadisə idi”
"İki sahil” qəzetinin baş
redaktoru Vüqar Rəhimzadə ölkəmizdə söz, fikir azadlığına kifayət qədər
diqqətin yetirildiyini vurğuladı: "Mətbuatın maddi-texniki bazasının
möhkəmləndirilməsi, jurnalist peşəkarlığının və məsuliyyətinin artırılması
istiqamətində həyata keçirilən tədbirlər, KİV-lərə birdəfəlik maddi yardımların
verilməsi müstəqil mətbuatın inkişafına təkan verir. Bu günlərdə Prezident
İlham Əliyevin ölkədə nəşr olunan qəzetlərə maliyyə yardımının ayrılması
haqqında Sərəncamını xüsusi qeyd etmək istərdim. Sənədə əsasən, qəzetlərə
birdəfəlik maliyyə yardımı göstərmək üçün Azərbaycan Respublikasının 2018-ci il
dövlət büdcəsində nəzərdə tutulmuş Azərbaycan Respublikası Prezidentinin
Ehtiyat Fondundan Azərbaycan Respublikasının Prezidenti yanında Kütləvi İnformasiya
Vasitələrinin İnkişafına Dövlət Dəstəyi Fonduna (KİVDF) bir milyon manat
ayrılması mətbuata dövlət qayğısının yeni parlaq təzahürüdür”.
Baş redaktor vurğuladı ki, Azərbaycan mətbuatı Heydər Əliyevin
hakimiyyətə qayıdışından sonra demək olar ki, tam mənada müstəqil mətbuat kimi formalaşmağa
başladı: "Düzdür, 90-cı illərin əvvəllərində mətbuata kifayət qədər basqıların
təzyiqlərin şahidi olmuşuq. Amma ümumilli liderin hakimiyyətə qayıdışından
sonra bütün sahələrdə olduğu kimi, mətbuata da xüsusi diqqət yetirdi. Bu gün də
Azərbaycan mətbuatı öz fəaliyyətini tam sərbəst davam etdirir. Senzuranın ləğvi
Azərbaycan mətbuat tarixində çox şərəfli bir hadisə idi. KİV-in üzərindən
dövlət nəzarətinin götürülməsi müstəqil mətbuatın inkişafına kifayət qədər böyük
təkan verdi”.
Müsahibimiz sonda mətbuatın 143-cü ildönümü münasibətilə bütün
həmkarlarımızı təbrik etdi və onlara yeni-yeni yaradıcılıq uğurları,
dövlətçiliyimizin möhkəmləndirilməsinə davamlı töhfələr verməyi arzuladı.
Aygün ƏZİZ