11 yaşında dəhşətli faciə yaşadı, Londonu fəth etdi - Portret
Dünya
çempionatını baxımlı edən əsas amillərdən biri də bu turnirdə iştirak edən
ortabab komandalardır. Xüsusilə, Afrika təmsilçiləri öz sürətli, əzmkar
oyunları ilə dördilliyin ən nəhəng futbol turnirini baxımlı hala gətirirlər.
Afrika futbolu deyəndə ağıla gələn ilk ölkələrdən biri də Nigeriya millisidir.
"Super qartallar” dünyanın ən nəhəng futbol turnirində ilk dəfə göründüyü
1994-cü ildən bəri qatıldığı bütün mundiallarda azarkeşlərin sevgisini qazanıb.
Bu il Rusiyada keçiriləcək mundialın da bu cəhətdən fərqlənməyəcəyi gözlənilir.
Nigeriya yığmasının heyətində bu tapşırığı yerinə yetirəcək yetərincə ifaçı da
var. Bunlardan biri də "Çelsi”nin vingeri Viktor Mozesdir.
Afrikada doğulmaq...
Afrika
qitəsi dünyanın ən qaynar bölgələrindəndir. Aclıq, səfalət, kütləvi
qırğınlar... Bir uşaq üçün "qara qitə”də dünyaya gəlmək, futbol dili ilə desək,
həyata 0:1 məğlub başlamaq deməkdir. Bugünkü qəhrəmanımız Viktor Mozes də
dünyaya gözlərini bu qitədə açıb. O, 1990-cı il, dekabrın 12-də Nigeriyanın
Laqos şəhərində, dindar ailədə dünyaya gəlib. Onun doğulduğu ölkə daim daxili
çəkişmələrlə gündəmə gəlib. Atası Ostin və anası Cozefina yeni doğulmuş
oğullarına "qələbə” mənasını verən Viktor adını qoyurlar. Ad seçimi uğurlu idi.
Lakin Mozes cütlüyü oğullarının gələcək uğurlarını, qələbələrini görməkdən
məhrum qalacaqlarını bilmirdilər.
Faciədən xilas və...
90-cı
illərdən etibarən Nigeriyada dinlərarası - müsəlmanlar və xristianlar arasında
münaqişələr pik həddinə çatmışdı. Yerli xristianlar radikal dini qruplar
tərəfindən təqib olunur, qətl edilirdi. Viktorun bu cəhətdən bəxti heç
gətirməmişdi. Onun atası Ostin keşiş idi. Radikal qruplar isə hücum zamanı əsas
hədəf kimi məhz dindarları seçirdilər. Bir gün balaca Viktor həmişə olduğu kimi
dostları ilə birlikdə futbol oynamaq üçün evdən çıxır. Ancaq bu zaman onun heç
ağlına gəlməzdi ki, valideynlərini son dəfə görür. Futbol onun ən sevimli məşğuliyyəti
idi. Özünün sözlərinə görə, dostları ilə topa bənzər nə tapsalar, dərhal futbol
oynamaq ağıllarına gəlirdi. Futbol oynadığı zaman əmisi təşviş içində gəlir və onu
dərhal dostunun evinə aparır. Balaca Viktor hansısa faciənin yaşandığının
fərqində idi, lakin yaşının azlığı baş verənləri dərk etməyə imkan vermirdi.
Əmisinin həyəcanı ona da sirayət etmişdi. Balaca Viktor ağlamağa başlamışdı.
Faciənin fərqinə varmadan.
Əslində,
baş verənlər təkcə Viktorun yox, bütün insanlığın faciəsi idi. 2001-ci ilin
fevralında radikallar həmişə olduğu kimi əks dinin nümayəndələrinə hücum
etmişdi. Həmin vaxtlar Mozes ailəsinin yaşadığı Kaduna şəhərində bu cür
hücumlar xüsusilə geniş vüsət almışdı. Hücum zamanı Ostin və Cozefinanın olduğu
kilsəyə od vurulmuş, hər ikisi faciəli şəkildə ölmüşdü. Radikallar adətən, bir
ailəni tamamilə məhv edirdilər. Belə olduğu halda, heç nədən xəbəri olmayan
Viktor da hədəf halına gəlmişdi. Əmisinin onu tələsik gizlətmək qərarına səbəb
də məhz bu amil idi. "Ailəm hardadı?”, "Evimə nə vaxt qayıdacam?”, "Burdan
çıxsam mənə nə edəcəklər?” sualları balaca Viktoru rahat buraxmırdı.
Yeni ev - İngiltərə
Həmin
vaxt Britaniya hökuməti hücumlara məruz qalan, həyati təhlükəsi olan
nigeriyalılara qucaq açmaq qərarı vermişdi. Xoşbəxtlikdən, Viktor da bu
imkandan yararlanmaq fürsəti əldə edir. Əmisi onu tez-tələsik bu ölkəyə yola
salır. Yolasalma o qədər tələsik olur ki, Viktor hətta valideynlərinin şəklini
belə götürə bilmir.
Bundan
sonra Viktor yeni həyata başlayır. 11 yaşında bir uşaq üçün həyat, yaşadığı
şəhərdən ibarətdir. Elə balaca Viktor üçün də eyni sözlər keçərli idi. O, bir
göz qırpımında özünü adi Afrika şəhərindən dünyanın ən böyük meqapolislərindən
olan Londonda tapmışdı. Ağlı ailəsinin yanında qalmışdı. Xoşbəxt deyildi. Burda
gördükləri onun üçün nə qədər maraqlı olsa da, sevinmir, təəccüblənmirdi. Mozes
valideynlərinin faciəsini məhz Londona getdikdən sonra öyrənir. Qəbul etmək,
öyrəşmək hər nə qədər çətin olsa da, vaxt keçdikcə yeni həyatına uyğunlaşır.
Faciəni unutduran futbol
Londonda
ona baxacaq qoruyucu ailə tapılır. Bu ailə balaca Viktora öz övladları kimi
baxır, onun "yaraları”nın sağalmasına kömək olurlar. Onun yenidən həyata
bağlanmasının digər səbəbi isə sevimli məşğuliyyəti - futbol olur. Viktor
oxuduğu məktəbin futbol komandasına seçilir. Bəxtindən təhsil aldığı məktəb
"Kristal Pelas” klubunun stadionu "Selherst Park”a yaxın məsafədə idi. Belədə,
"qartallar”ın skautları tez-tez məktəbə baş çəkir, burda top ardınca qaçan
azyaşlıları diqqətlə izləyirdilər. Bu zaman isə Mozesi görməmək mümkün deyildi.
Həyatda aldığı bütün zərbələri topdan çıxaran balaca Viktor, məktəb
komandasının heyətində qatıldığı bütün yarışların əsas simasına çevrilirdi.
Qolları sıralayan nigeriyalı uşaq skautların diqqətindən yayınmır və Mozesin
"Kristal Pelas” macərası başlayır. Bu komandanın aşağı yaş qrupunda möhkəmlənən
Viktor, cəmi 16 yaşında peşəkar futbolçu kimi debüt edir. O, Çempionşipdə
"Kardiff”ə qarşı matçda meydana çıxır. Bundan sonra onun karyerası yüksələn
xətt üzrə inkişaf edir. 2010-cu ilin yanvarında, həmin vaxtlar Çempionşipdə
çıxış edən "Krsital Pelas”dan Premyer Liqa təmsilçisi "Viqan”a transfer olur.
Yüksək liqa təmsilçisi Mozes üçün 2,5 milyon funt-sterlinq ödəyir.
Mourinyo göndərdi, Konte qaytardı
Mozes
Premyer Liqada da özünü yaxşı tərəfdən göstərir. "Viqan”da çıxış etdiyi 2,5 il
ərzində 80 oyun keçirən gənc futbolçu, 9 qola imza atır. Bu cür istedad
İngiltərə nəhənglərinin diqqətindən yayına bilməzdi. Mozes də Premyer Liqa
nəhənglərindən "Çelsi”nin diqqət mərkəzinə düşür. 2012-ci ildə Eden Azar, Marko
Marin, Oskar kimi gənc istedadları heyətinə cəlb edən "zadəganlar”, bu siyahıya
Viktorn da adını daxil edir. London təmsilçisi onun keçidi üçün 11,5 milyon
avro ödəyir. Lakin Mozesə dünya futbolunun aparıcı simalarının top qovduğu
"Çelsi”də əsas heyətə düşmək elə də asan deyildi. Buna baxmayaraq, o, ilk
ilində 43 oyunda şans qazanır, 10 qola imza atır. Həmin mövsümdə "Çelsi” Avropa
Liqasını da qazanır. Mozes isə London təmsilçisinin qitənin ikinci dərəcəli
klub turnirini qazanmasına meydana çıxdığı 10 matçda 5 qolla töhfə verir.
Lakin
uzun fasilədən sonra "Çelsi”yə qayıtmış Joze Mourinyo yeni komandasında Mozesi
görmürdü. Belədə, o, növbə ilə "Liverpul”, "Stok Siti” və "Vest Hem” kimi
komandalara icarəyə verilir. 2016-cı ildə "Çelsi”nin "sükanı arxasına” keçən
Antonio Konte isə fərqli addım atır. Nigeriyalının istedadına güvənən italyan
mütəxəssis, özünə lazım olan futbolçuların siyahısına onun da adını daxil edir.
Beləliklə, Mozes 3 il sonra "Çelsi”yə qayıdır. Viktor italyan mütəxəssisin ona
olan etimadını tam doğruldur. Premyer Liqada 38 oyunun 34-də şans qazanan
Mozes, "zadəganlar”ın çempionluğunda mühüm pay sahibi olur. Viktor cari
mövsümdə də Kontenin güvəndiyi oyunçular arasındadır.
Vətən sevgisi
Mozes
ilk dəfə milli formanı 2005-ci ildə, "Kristal Pelas”ın üzvü olduğu zaman
geyinib. Lakin o, doğma vətəni Nigeriya yox, İngiltərə yığmasının U-16
komandasında çıxış edib. Viktor növbə ilə İngiltərənin U-17, U-19 və U-21
komandalarında da top qovub. O, hətta U-17-nin heyətində Avropa çempionatının
gümüş medallarını da qazanır. Lakin Viktor əsas milli seçimində fərqli addım
atır. Mozes ona faciələr yaşatmış Nigeriyanın futbol millisində oynamağı üstün
tutur. Düzü, onun debütü bir qədər yubanır. Sanki həyat da ona faciələr
yaşatmış vətəninin millisində debüt etməsini istəmirdi. Onun Nigeriya
yığmasında ilk oyunu 2011-ci ilin əvvəlində, Qvatemala ilə yoldaşlıq oyununda
baş tutmalı olsa da, bu görüş ləğv edilir. Həmin ilin martında, Keniya və
Efiopiya ilə matçlarda debütünə isə FİFA mane olur. Belə ki, dünyanın ali
futbol qurumu Viktorun sənədləri ilə bağlı problemlər olduğundan, onun
"qartallar”da debütünə icazə vermir. FİFA Mozesin doğma vətəninin yığmasında
çıxış etməsinə yalnız 2011-ci ilin noyabrında "yaşıl işıq” yandırır. Onun
yığmada debütü isə 2013-cü ildə, Kabo-Verde ilə yoldaşlıq oyununda baş tutur.
Mozes elə həmin ildə CAR-da keçirilən Afrika Millər Kubokunda Nigeriya
millisinin heyətinə daxil edilir. Viktorun ayağı vətəninə düşərli olur. Belə
ki, "qartallar” məhz Cənubi Afrikadakı yarışda 19 illik fasilədən sonra qitənin
ən güclüsü olur. Mozes bu çempionluqda yaxından iştirak edir. Viktor növbəti
ildə, Braziliyada təşkil edilən mundialda da millinin əsas üzvlərindən olur.
"Qartallar” qrup mərhələsini adlasa da, 1/8 finalda Fransa səddinə ilişir -
0:2.
Mozes bu
il Rusiyada keçiriləcək dünya çempionatında da Nigeriya millisinin əsas
"silah”larındandır.
Xatirələrdə yaşayan Kaduna kabusu
Mozes
kiçik yaşlarından valideynlərini itirdiyindən, İngiltərədə qoruyucu ailənin
yanında böyüyüb. Ancaq bu ailə ona hər cür qayğı göstərib, dəstək olub.
Yaşadığı ailə faciəsinin üzərindən uzun illər keçsə də, o, hələ də həmin
hadisələri xatırlayır. Bu faciənin şoku hələ də Viktorun üzərindədir. Təsadüfi
deyil ki, o, millinin oyunları ilə bağlı vətəninə getdiyi zaman, Kaduna
şəhərini ziyarət etmir.
Viktor
şəxsi həyatı ilə heç vaxt gündəmə gəlmir. Mətbuata yalnız onun Brentli adında
oğlunun və Naya adında qızının olduğu məlumdur. Həyat yoldaşının isə yamaykalı
olduğu deyilir.
Oyun tərzi
Viktorun
doğma mövqeyi yarımmüdafiənin sağ cinahıdır. O, vinger və orta xəttin sol
cinahında da çıxış edə bilir. Mozesin işlək ayağı sağdır. Nigeryalı meydanda
afrikalılara məxsus olan sürətli reydləri ilə diqqət çəkir. Uşaq vaxtlarında
irəli xəttə bombardirlik bacarığını nümayiş etdrən Mozes, hazırda hücum
xəttindən geridə çıxış etdiyindən, bu vərdişindən bir qədər geri qalsa da,
hücumlarda ən fəal iştirak edən futbolçulardandır.
Viktorun
"Çelsi” ilə müqaviləsi 2021-ci ilin yayına kimi nəzərdə tutulub. Onun məşhur
idman geyimi markası olan "Nike”la da müqaviləsi var. Mozes bu şirkətin reklam
simalarındandır.
Portret
Viktor
demək olar, uşaqlıq yaşamayıb. Onun uşaqlıq dövrü 11 yaşında, Kadunada yaşanan
faciədən sonra bitib. Heç bir uşaq bu cür faciənin öhdəsindən gələ, bu yükü
qaldıra bilməzdi. Mozes həyatın ona vurduğu bütün zərbələrin acığını futbolda uğur
qazanmaqla çıxdı. Yaşadığı faciə onu depressiya uçurumuna yox, əzmkarlığın bəxş
etdiyi zirvələrə yüksəltdi. Ancaq Mozes bu zirvəyə qalxarkən ürəyində kin,
nifrət bəsləmədi. Elə buna görə, keçmişin verdiyi ağrı-acıya rəğmən, Nigeriya
millisində oynamaq qərarı verdi. Bu gün o, bu yığmada başqa dinə mənsub
insanlarla çiyin-çiyinə, qardaş kimi çıxış edir - keçmişin verdiyi ağrı ilə, lakin
kin olmadan...
Elnur